puis y arriua messire Antoine de Senectaire, Euesque du Puy et Comte de Vellay, personnage segnallé et de grand pouuoir et auctorité en l’vn et l’autre bras. Le sieur Vicomte de Polignac qui est seigneur en partie de ladicte ville de Sainct Agreue, Lysuar de la tour Maubourg, vieil et ancien guerrier aussi, et vn si bon nombre d’autres seigneurs et gētilshommes desdits pays de Vellay et Viuarois qu’il faisoit très bon veoir vne si grande noblesse et si honorable compagnie.
Le siege arresté Messieurs de dedans faisoient bonne contenance et tiroient tant qu’ils pouuoient de mousquets et harquebouzes à croc, vsoient de plusieurs propos iniurieux et diffamatoires cōtre les sieurs dessusdits et autres de la trouppe à la maniere de gēs assiegez, ausquels comme pauures prisonniers, esclaues et galleriens est permis ou tolleré de dire ce que bon leur semble. Enfin les pieces arrivées conduictes par le sieur de Gondras Lieutenant du sieur de la Guiche, grand maistre de l’artillerie du Roy. En toute assourance poussees et bracquees de deux costez, la batterie auroit esté cōmēcée le Ieudy vingt deuxiesme iour dudict mois de Septembre, et faicte bresche de chacū desdits costez d’ēuiron de douze pas seulement. Laquelle ne se trouuant raisonnable, et d’autant qu’il y auoit encore grāde hauteur de muraille : La batterie fust continuee le lendemain vendredi, et l’artillerie bracquee au milieu des bresches commencees pour dōner à la muraille qui estoit entre deux, laquelle se trouuoit desia bien esbrālee, ce qui retarda pour ce iour là de passer plus outre. Au fait de ladicte batterie fust la nouvelle qui suruint du sieur de Chambaud, gouverneur dudit Sainct Agreue, lequel estant sorty de ladite ville quelques iours auparavant le siege courust et debagua par tous les lieux et endroicts de leur faction pour recouurer gens et donner secours aux assiegez, et apparust le mesme iour enuiron les vnze heures auant midy, vn peu loing de la ville et du camp en nombre de soixante à quatre vingts cheuaux, et de cent à six vingts harquebouziers, qui donna quelque peu de courage aux assiegez, et leur fist renouueller le babil et iazerie pour quelque peu de temps : Mais apres auoir fait par ledict Chabaud quelque semblant de bonne contenance voyant qu’il se dressoit vn escadron de cauallerie pour luy courir sus, se retira et n’a ozé depuis cōparoistre. Tellement que ceux de dedans se voyant priuez dudict
