requeste, qu’il peut auoir entour cinquante quatre, ou cinquante cinq ans, et estre bien mémoratif que la chambre des comtes apartenans à messieurs du Chapitre dudit Brioude se brusla ; et le sçait, parceque auec plusieurs autres enfans, entendant l’incendie de ladite chambre y accoururent, et virent un grand feu qui brusloit ladite chambre, et d’y auoir ouy dire, lors de ladite incendie, par aucuns de ceux qui sy estoient portéz pour esteindre ledit feu, et empescher que autres domaines y joignans ne fussent bruslez, que grande quantité de papiers s’estoient bruslez, et que, sans la grande diligence, plusieurs autres papiers de conséquence se fussent bruslez comme les autres, mais, par ladite diligence, furent concernez. Dit dauantage auoir ouy dire que, parmy le marrain de ladite chambre bruslée, se trouua d’or ou d’argent fondu. Et autre chose a dit ne sçauoir, si ce n’est ce que dessus contenir vérité. Et a signé, H. Nozerines, auec parraphe. Et a costé est escrit : taxé audit Nozerines, pour sa journée et despense, XVI sols.
Et après, lesdits Sieurs d’Arpheulhete et de la Valette, comparans par de Grolhat, leur advocat, nous ont dit et remonstré auoir fait appeller Pierre Taillechausse, laboureur de ladite ville, pour estre ouy sur le fait de ladite commission, lequel ne peut comparoir deuant nous, à cause de son indisposition et caducité, estant détenu dans le lict. Si nous ont requis nous vouloir porter dans sa maison, auec nostre adjoint, pour receuoir sa déclaration, ce que nous leur auons accordé. Et, en effect, nous nous sommes portez dans la maison dudit Pierre Taillechausse, lequel nous auons trouvé dans son lict, estant en bonne mémoire, et auons de luy prins et reçeu son serment. Et enquis sur l’exposé de ladite requeste, a luy faite lecture d’icelle, a affirmé estre aagé de quatre vingt cinq ans, et n’estre parent des partyes et les bien cognoistre, comme habitant de ladite ville de Brioude, et bien mémoratif qu’il peut auoir entour cinquante cinq ans, que la chambre appellée des comtes, apartenant à messieurs du Chapitre dudit Brioude, qu’estoit située et posée dans le cloistre de l’église monsieur Saint Julien, se brusla entièrement, et
