Cette page n’a pas encore été corrigée
venant à la violence, puis que la douceur n’y servoit de rien, ils luy firent desserrer les dents avec un baston, et luy misrent quelque peu de viande dans la bouche : mais il leur cracha tout au nez. Clarimond qui avoit l’esprit fort subtil, luy dit alors, monsieur le saule, au moins si vous ne voulez manger, ne voulez-vous pas boire ? J’ay fait aporter un excellent breuvage. Il vaut bien du nectar de la premiere cuvee. Les arbres ne mangent ny ne boivent, vous dy-je, respondit Lysis, ne vous sçaurois-je mettre cela en la teste ? Que vous estes abusé, repliqua Clarimond, comment est-ce que les plantes pourroient croistre si on ne les arrousoit ? Je veux bien que vous m’arrousiez, dit le saule, mais il
