me faloit oster quelque branche, ce ne fust que pour faire une armoire à ma maistresse. Lysis declara apres de quelle sorte il avoit pris ce Carmelin à sa suite, et qu’il esperoit en faire un des plus honnestes bergers de la France. Il le fit aprocher et Oronte l’ayant consideré jura qu’il connoissoit ce visage pour l’avoir veu quelque part, et qu’il s’imaginoit que c’estoit à Troyes. Il se peut faire que vous le prenez pour le pasteur qui jugea les trois deesses, et que vous croyez qu’il soit troyen, dit Lysis, mais il ne l’est pas : il m’a apris qu’il est lyonnois, et c’est en partie pour ce suject que je l’ay voulu associer avec moy, me figurant que Lyon estant proche du païs de Forests, il en peut venir de bons bergers. Je ne vous veus
