Cette page n’a pas encore été corrigée
discours, vint à parler de cette premiere maistresse, asseurant que son amy l’avoit quitee et qu’elle estoit mariee à un autre. Toutesfois Angelique persevera en ses desdains, et comme Anselme luy remonstroit tousjours la grandeur de son amour, elle luy dit que la passion dont il confessoit estre touché, estoit une extravagance, aussi bien que celle de Lysis. C’est estre bien rigoureuse de le dire (luy respondit Anselme) car je ne pense pas que vous le croyez. Vous sçavez que vos perfections n’ont encore fait naistre en mon ame que des pensees et des desirs bien reglez, et que pour mes actions, elles sont fort differentes de celles de nostre berger. Les effets de l’amour sont divers, repartit Angelique,
