amps, il s’en retourna chez Oronte pour contenter les fantaisies de Lysis qui luy donnoient beaucoup de peine. Il arriva tout à point pour trouver un barbier de Coulommiers qui en sortoit. Il le pria de venir saigner son maistre. Le barbier n’avoit point de cheval ; il s’en vint avec luy à pied jusques chez Bertrand, et comme il eut demandé à Lysis de quel bras il vouloit estre saigné, le berger luy dit qu’il le vouloit estre du mesme bras que la belle fille qu’il venoit de saigner chez Oronte. Le barbier ayant dit que c’estoit du bras gauche, il luy prit le sien, et en tira pour le moins trois palettes de sang. Je me doute bien que c’est aussi à la joue gauche que cette belle à mal, dit Lysis. Vous avez raison, monsieur, repartit le barbier. Bandez
