Cette page n’a pas encore été corrigée
assez d’eau pour cela, puisque des hommes qui n’estoient pas de plus grande corpulance que toy, ont bien esté changez en fleuves et en montagnes. Les habitans du ciel pourvoyent à tout ce qui se faict icy bas, et quand ils ne pourroient rendre le cours de ton ruisseau, ny fort large ny fort long, ils feroient en sorte qu’à cinquante pas de ta source où environ, tes eaux seroient englouties sous terre, et par des conduits secrets retourneroient au lieu dont elles seroient venües à fin de ne tarir jamais. Cela ne seroit point extraordinaire ; il y a de grandes rivieres au monde qui se font des chemins par dessous terre, et mesme il faut croire que la mer s’engouffre en de grands abysmes
