Cette page n’a pas encore été corrigée
le mien et de monstrer que j’ay donné a chaque personnage celuy que je croyois luy estre le plus propre. Au reste j’empescheray que cela ne desgouste les femmes et ceux qui n’ont point d’estude, car puisque j’ay entrepris de faire un livre comique et satyrique tout ensemble, la doctrine y sera plus douce que severe, et les discours serieux n’y auront pas plus de place que les facetieux. L’on s’imaginera peut estre à m’ouyr que je suis picqué sur le jeu, et que j’ay une extreme passion à faire paroistre que je puis deffendre mon livre mot pour mot : mais je feray voir que la colere ny la vanité ne me commandent point, et que si je me dispose à vous donner un livre hardy, c’est pource que je ne sçaurois celer la verité.
