l’autre, et ainsi fait il changer de parens à toutes les quatre saisons pour les accommoder à ses desseins. Pour sa franciade, il y a presque à dire les mesmes choses contre elle que contre les autres poësies que nous avons desja nommees, car si Virgile a imité Homere, Ronsard a imité Homere et Virgile tout ensemble, mais d’une imitation si vile et si basse qu’elle ne luy est point pardonnable. Si Pallas cache Ulysse d’une nuë, quand il va treuver le roy Alcinous, et si Venus cache de mesme Enee quand il va trouver Didon, il a falu que Ronsard ayt dit aussi que cette deesse fit la mesme faveur à Francus quand il alla vers le roy Dicee, bien qu’il ne dise point quel besoin il estoit de cacher ainsi cét heros. Ce Francus avoit souffert un naufrage sur la
