canons, non ſans perte de quelques Soldats. Mais c’eſtoit n’auoir rien fait que cela, pour autant qu’apres ce rempart, il en reſtoit cinq autres encore plus forts que celuy là, deuant que venir à la Citadelle, & ſi les barbares, qui s’eſtoient campez dans les bois, tiroient aux Portugais force coups de fleches. C’eſt pourquoy le iour enſuyuant, les Portugais furent contrains de changer de conſeil, & de leuer l’anchre, pour aller à Malaca, auec leur grãde perte & courte honte. Enuiron ce temps il y auoit de fortune quelques nauires qui manquoiẽt, mais on ne laiſſa pas pour cela d’aller. Sur le chemin on s’arreſta pour faire aiguade en vn lieu fort propre. Cependant le Vice-Roy deſpeche vne galere vers Malaca, afin de recognoiſtre les affaires, & aduertir les aſſiegez de ſa venuë. Là deſſus le 3. d’Aouſt, ils entendent par l’arriuée d’vne barque, que les Hollandois auoiẽt aſſiegé la ville depuis trois mois, en compagnie de dix Roys, & que les aſſiegez mouroient de faim, reduits à l’extremité. Ce qui fut confirmé parle Threſorier de Malaca, que le Gouuerneur d’icelle ville auoit enuoyé tout au commencement du ſiege au Vice-Roy, pour l’aduertir de ce qui paſſoit, & ayant couru tout ce temps ſur
