Page:Tristan L’Hermite - Les Amours de Tristan, 1638.djvu/71

La bibliothèque libre.
Le texte de cette page a été corrigé et est conforme au fac-similé.


LES LOVANGES DV VERT.

STANCES.



IE veux eſleuer iuſqu’aux Cieux
Vn Obiect qui plaiſt aux beaux yeux
Que les miens trouuent adorbales :
Et monſtrer auecque raiſon
Qu’entre les couleurs agreables
Le vert eſt ſans comparaiſon.

Lors que le Monde fut produit
La premiere fois que la Nuit
Quitta ſa place à la lumiere ;
Entre mille rares beautez
Le vert fut la couleur premiere
Dont les yeux furent enchantez.

Le vert est l’ame des deſirs,
Et l’auant-coureur des plaiſirs
Que le doux Printemps nous apporte
Lors que la Terre eſt en dueil,
Lors que la Terre paroiſt morte
Le vert la tire du cercueil.