Le texte de cette page a été corrigé et est conforme au fac-similé.
SVR LA COLERE DE PHILIS.
STANCES.
ELLE Philis obligez moy
De me faire ſçauoir pourquoy
Mes ſoins vous mettent en colere,
Car ie ne puis me figurer
Ce que i’ay fait pour vous deſplaire,
N’ayant fait que vous adorer.
Sans doute c’eſt ma paßion
Qui cauſe ceſte auerſion
Que m’exprime voſtre ſilence :
Voyez quel eſtrange ſuccez,
On me hait auec violence
Pource que i’aime auec excez.
Ô Dieux ! quelle iniuſte rigueur
Pour vous auoir donné mon cœur,
I’ay donc merité voſtre haine :
Et i’ay failly pour vous offrir
Ce que la beauté d’vne Reine
Auroit eu peine à s’acquerir.
