Cette page n’a pas encore été corrigée
Il m’aimme mout, et je lui plus ;
- Que l’amors ne puet estre graindre.
- Onques ancor ne me soi faindre
- De lui amer ne je ne doi.
- Don n’est mes sire fiz de roi ?
- Don ne me prist il povre et nue ?
- Par lui m’est teus enors venue,
- Qu’ains a nule desconselliee
- Ne fu si granz aparelliee.
- Et s’il vos plest je vos dirai,
- Si que de rien ne mantirai,
- Comant je ving a tel hautesce ;
- Ja del dire ne m’iert peresce."
- Lors li conta et reconut
- Comant Erec vint a Lalut ;
- Car ele n’ot del celer cure.
- Bien li reconta l’avanture
- Tot mot a mot, sanz antrelés ;
- Mes a conter le vos relés
- Por ce que d’enui croist son conte
- Qui deus foiz une chose conte.
- Que qu’eles parloient ansanble
- Une dame sole s’an anble
- Qui as barons l’ala conter
- Por la joie croistre et monter.
- De ceste chose s’esjoïrent
- Tuit ansanble cil qui l’oïrent.
- Et quant Mabonagrains le sot
- Por s’amie grant joie an ot
- Por ce qu’ele s’an conforta.
- Et cele qui lor aporta
- La novele hastivemant,
- Les fist mout liez sodainnemant.
- Liez an fu meïsmes li rois
- Qui grant joie feisoit einçois ;
- Mes or la fet il mout greignor,
