lux? IV
Vous qu’Æthna de gorge beante
Estonne en ses brasiers ardans,
Voyez le feu que j’ay dedans
Qu’avec tant de souspirs j’esvante,
Et puis dittes assurément:
Plus grand est cet embrasement. V
Si toutesfois vostre creance
Est foible à tant de nouveautez,
Voyez une fois les beautez
D’où procede cette puissance.
Vous direz, ravis de les voir:
Plus grand encor est leur pouvoir.
Toute la trouppe tourna incontinent les yeux sur Hylas, comme le voulant advertir qu’il auroit bien à faire avec un plus fort ennemy; et Stelle y prenant garde: Mon serviteur, luy dit-elle, toute cette compagnie tourne l’œil sur vous, pour voir si vous ne palissez point à la rencontre de ce fier champion; et moy comme les autres, j’attends de voir la deffence que vous ferez de ma beauté, car je serois bien-aise que pour vostre gloire vous vinssiez à bout d’une si honorable entreprise; non pas que je me soucie de l’interest que j’y puis avoir, sçachant assez que si la beauté gist en l’opinion, il n’y a bergere au monde qui en ait plus que moy. – Ma maistresse, respondit-il froidement, laissez