d’apprendre ces choses, qu’elle en faict une habitude laquelle, encores qu’il soit difficile de changer ou de perdre, toutesfois, ainsi que toutes les autres, peut estre et changée et perdue. Ce que l’on veoid ordinairement advenir en la cire par la force du cachet, car encore qu’on y ait imprimé une figure, toutesfois si l’on veut, en y mettant un autre cachet, elle perd la marque du premier, tant parce que l’ame n’ayant imprimé ce caractere en ses sens et en son corps, que parce que ceste beauté celeste luy plaisoit, il est certain que si par nonchalance elle vient à ne s’y plaire plus, ou bien que quelque nouvel object, auquel sa volonté, se laisse aller, marque sa fantaisie d’une autre figure, elle perd la premiere ressemblance et n’en retient rien du tout. Et alors celuy qui aura esté aimé de luy ou qui l’aura aimé par sympathie, perdant ceste ressemblance qu’il avoit, perd aussi l’amour qui en estoit causée, car tout ainsi que les habitudes, la sympathie aussi se peut perdre et acquerir. Mais, Hylas, si toutes les fois que vous avez changé, vous avez imprimé en vous une nouvelle idée de quelqu’autre chose, il n’y en doit guere plus avoir en tout le monde qui n’ait esté quelquefois imprimée en vous, de sorte que ma fille peut esperer que vous serez plus constant pour elle que pour les autres, non pas pour mériter plus que celles qui l’ont devancée, mais pour avoir esté la dernière.
Chacun se mit à rire oyant
