d’autre chose que de courage, et que cela me faict juger qu’il se tient pour si puissant qu’il pourroit bien encores entreprendre quelque chose de pire. – A la verité, dit Cleontine, quand le sujet perd ce naturel respect qu’il doit à son seigneur, il le faict par faute de jugement, ou pour se sentir si puissant qu’il n’en craint point l’indignation, et c’est à quoy il faut bien prendre garde.
Avec de semblables discours, elles arriverent en la maison de la sage Cleontine, où Galathée entra, tant pour se reposer, que pour faire panser l’estranger, auquel toutes ces nymphes ne pouvoient faire assez d’honneur et de demonstration de bonne volonté. Et mesme Silere, qui en une autre saison eust eu moins agreable sa victoire, lors qu’Argantée n’estoit point sorty avec elle des termes de la discretion, mais depuis que son amour s’estoit changé en medisance, elle luy avoit pris une haine si grande qu’elle eut bien le courage de le voir mort sans luy donner une seule larme, tant l’injure presente efface aisement les services passez.
Le chevalier fut incontinent desarmé et visité par les mires, qui ne luy trouverent que la seule blesseure de l’espaule, qui estoit
