on ne se ressouvient point, il vaudroit autant qu’elles n’eussent point esté. Sois certain, Silvandre mon amy, que tu trouveras force femmes qui s’accorderont à cette ordonnance, parce que l’ingratitude qui leur est naturelle, est pour les bienfaicts receus, la mere de l’oubly. Mais ayant tousjours creu que c’estoit vivre en personne de peu de jugement, que de vivre sans conte, je remarque de telle sorte les services que je leur rends, que, si elles font semblant de ne s’en souvenir point, ou de n’y prendre pas garde, je les leur dis et redis si souvent, qu’elles sont bien sourdes, si enfin elles ne les entendent. Aussi, pour dire la vérité, je pense que si tes services meritoient autant que les miens, tu ne les donnerois pas à si bon marché, ou pour mieux dire, tu ne les voudrois pas perdre si inutilement, car quant à moy, je tiens que les moindres que je rends méritent une très-grande recompense. – Si je ne sçavois, respondit Silvandre en sousriant, que tu es de l’isle de Camargue, je penserois, te voyant faire si grand cas de si peu de chose, que tu fusses né dans une certaine contrée des Gaules, où les habitans ont trois conditions qui ne semblent pas estre fort esloignées de ton humeur. – Et quelles sont-elles ? adjousta Hylas. – Je ne les voulois pas dire, reprit Silvandre, mais puis que tu me presses, il faut que tu les sçaches : la premiere, c’est qu’ils sont riches de peu de bien, l’autre, docteurs