qui est le Dieu supresme, avoit mis entre mains aux hommes, pour s’en servir, certaine espèce de biens qu’ils appelloient indifferens, c’est-à-dire qui n’apportoient ny bien ny mal aux hommes, si non autant que les hommes les applicquoient à l’usage, fust à bien ou à mal, comme l’on peut dire de l’or, l’argent, le fer et autres metaux, et bref de toutes choses inanimées. Ainsi avons-nous en la police, tant civile que mesme en l’ecclesiastique, certaines choses qui sont indifferentes, et non pas necessaires du tout, comme, en celle-cy, nous autres, qui sommes plus zelés, ne sommes tenus de croire outre et pardessus ce qui est comprins dans les tables de la loy que Dieu nous a données par le bon père Moyse, et ce que l’Eglise nous commande de croire, le reste demeurant à la discretion d’un chacun. Que si l’on nous propose quelque chose davantage, c’est plustost par conseil que par ordonnance et commandement exprès. Tout de mesme en la police civile, prenant pour exemple le subjet du present livret que je vous ay adressé : car c’est bien une chose que le mariage, qui demeure entierement à la disposition volontaire des hommes contre les necessitez qu’y apportoient jadis les anciens ethniques et payens, ne differans en beaucoup de choses des bestes bruttes que de la seule parole. Et ce vaisseau d’election, monsieur sainct Paul, en parlant en ses epistres, dit en ces termes, que qui se marie fait bien, mais qui ne se marie pont fait encore mieux. Comme s’il vouloit entendre que l’on s’en abstînt pour vouer à Dieu sa virginité, ce qui ne se peut toutes fois maintenir aisement ny observer un tel vœu sans y apporter pour aide et support la prière, le jeusne et la solitude, ainsi que vous faites, Madame, qui est
