Elles en ont d’autres au coffre !…
Les plus reformez sont vaincus
Par le blond lustre des escus2.
Vrai est que par obeissance
Il leur en fit recognoissance,
Et vray qu’en l’obligation
Il a mis la condition
De ne payer qu’au prealable
Il n’eust moyen. Au cas semblable,
Il est très veritable encor
Que la dame, en livrant cest or,
L’asseura que de la cedule
Ne s’ensuivroit poursuite nulle,
Et qu’elle en soit prise à serment :
Il ne ment, pour luy, nullement.
Et toutesfois dame Renée,
Contre la parole donnée,
À tout propos, mal à propos,
Ne le laisse point en repos.
À peine est-il seur en l’eglise,
Où les criminels ont franchise3.
Elle en veut, il n’a pas de quoy.
Necessité n’a point de loy.
Messire Jean est pauvre prestre.
Riche de rien l’on ne peut estre.
Il n’a rente ny revenu,
Gros benefice ny menu ;
Il n’a pas mesme une chapelle :
2. Les écus d’or, valant trois livres.
3. Le plupart des églises de Paris étoient lieux d’asile. L’enclos du Temple, le Louvre, avoient aussi ce privilége.
