[1]L’on trove escrit à Saint Denis, es gestes des rois de France, que li Juif furent essillié dou roiaume autrefoiz, ou tens ancien. Car au tens que li rois Dagoberz, fiuz le fort roi Clothaire, governoit le roiaume, uns empereres qui avoit non Eracles governoit l’empire de Rome. Cil Eracles estoit sages es clergies liberaus[2], et meismement en l’art d’astronomie, qui en ce tens estoit en grant auctorité. Mais puis que la foiz moultiplia et sainte Eglise vint en pooir, ele fu abatue pour ce, si come aucun dient, que ydolatrie ot de li commencement et naissance. Icil Eracles escrist au devant dit roi Dagobert, que il destruisist toz les Juis de son roiaume, et li rois le fist si come il li manda. La cause de ceste chose fu pour ce que cil Eracles avoit esperimenté par les signes des estoiles, que li poples circoncis devoit destruire l’empire de Rome. Mais li empereres fu en partie deceuz, quar ce que il entendi des Juis fu fait par une gent que l’on soloit apeler Agarins ; mais or sont appelé Sarrazin, car il avint puis que il pristrent l’empire de Rome et le mistrent à gast et à confusion.
Incidence. — Sains Methodes, li martyrs, fait mention d’une pestilence qui doit avenir vers la fin dou monde, et dit que li Ysmaelicien doivent venir. C’est uns poples qui descendi d’Ysmael. Cil Ysmael fu fiuz Abraham, non pas de sa fame, mès de sa chamberiere. Circoncis fu, et de tiex genz nous fait un escrit cil sains Methodes, et dit que en la fin des tens, devant l’avene-
