et jura que toz jors mais seroit loiaus à la corone de France ; et li rois, de sa debonaireté et de sa largece, li rendi le chastel entierement ot totes les apartenances ; mais entant contint sa largece que il en retint la segneurie.
Incidence. — En cel an[1] fu eclipse de souleil particulere le premier jor de mai, en l’eure de nonne. Si estoit li solaus en signe de Torel.
[2]Ne demora pas moult longuement après, que li evesques et li abbé et totes les religions de Borgoigne envoierent messages au roi et se complainstrent moult malement dou duc. Pour Dieu et pour pitié li requeroient que il adreçast ceste chose, et que il leur feist tenir les chartres et les munimenz que li preudome donerent, qui les eglises avoient fondées par leur devotion. Car ancienement, li bon roi de France, par la grant devotion que il avoient à la foi crestiene, fonderent les abbaïes et les eglises, si come li premiers rois crestiens, qui ot non Cloovis, li rois Clothaires, li rois Dagoberz et li granz Karlemaines[3], et cil qui après furent, quant il orent occis et chaciez les paiens dou roiaume, à granz ahans[4] et a granz effusions de sanc,