que de simple moyne il fu fait prieur de Sainte Babile[1], et puis abbé de Fescamp, et puis evesque d’Arraz, et après arcevesque de Sens, et après arcevesque de Roen ; et furent toutes ces promocions à lui faites par le pape Jehan. Et au derrain, par le pape Benedic, il fu fait cardinal, lequel pape mort, il fu esleu en pape, jasoit ce qu’il fust des plus jeunes cardinalz.
Et environ ce temps que le siege du pape vacoit, Jehan duc de Normendie, filz du roy de France, et le duc de Bourgoigne, son oncle, de par le roy de France envoiez à Avignon[2] à procurer l’eslection et meismement la promocion de Pierre Rogier, prestre cardinal, jadis arcevesque de Roen ; si leur vindrent nouvelles, endementres qu’il estoient en chemin, que à leur souhait et entencion le message estoit fait et parfait pour lequel il estoient en chemin ; noient moins il ne desisterent point d’aler à Avignon. Mais quant il furent là, le pape nouvellement créé les reçut et tout le college des cardinaulz très honnorablement. Si avint que quant le pape nouvel créé aloit à son coronnement, les II dux, l’un d’une part et l’autre d’autre, touz à pié tenoient le frain et gouvernoient le cheval du pape. Et au disner, du premier mès il le servirent ; et après les sollempnitez qui apartiennent à telles besoignes, et leurs messages faiz, il pristrent congié du pape et s’en retornerent en France[3].
- ↑ Il fut nommé prieur de Saint-Bausile au diocèse de Nîmes, le 24 avril 1324 (Denifle et Châtelain, Chartularium Universitatis Parisiensis, t. II, p. 272).
- ↑ Charles, comte d’Alençon, et Louis, comte de Flandre, les accompagnèrent dans ce voyage (Ernest Petit, Histoire des ducs de Bourgogne de la race capétienne, t. VII, p. 271).
- ↑ Eudes IV était rentré en Bourgogne au commencement de
