maſquez redoubloit le deüil de la maiſon ; mais il n’en fut pas de meſme le lendemain que la fiévre avoit fait parler le malade dans ſes réveries, avant qu’il mourut. Il avoit preſque tout découvert, & prenant ſa femme pour moy, qu’il demandoit à toute heure, il luy avoit reproché le coup de piſtolet : On avoit compris à quelques autres diſcours interrompus, que c’eſtoit de moy qu’il parloit. L’allarme ſe mit auſſi-toſt dans la famille, on ceſſa de me plaindre pour m’accuſer, & avec d’autant plus de violence, que le fils de la maiſon, dont on me croyoit la cadette, eſtoit mort, comme j’ay déjà-dit, & que j’eſtois le ſeul obſtacle qui pouvoit empeſcher les parens du mary d’heriter d’un bien conſiderable. Madame de Moliere elle-meſme, quelque attachement qu’elle eut pour moy, en memoire du Duc qu’elle n’a-
