Cette page a été validée par deux contributeurs.
Lors dist li fels : « So est la pure,
Briement moras ; ge le te jure
Par mes deus, qui sont en mon reine,
Agaba, Rache et Apoloine ;
Essample auront mes gens par tei
De mort, si tendront miaus ma lei.
Verrai se ti deus te delivre
De mes mains et te fera vivre
ar les cheviaus et par la gorje,
Il fist alors trainer saint Jorge ;
En la roé le fist-il metre
Dont nos parle sa vis la letre.
La roe esteit de fer et dure,
Trenchant partot à desmesure ;
Broches i ot de fer agues
Et serres forment esmolues ;
Enmi avoit glaives dreciés
Dunt saint Jorge fu mult bleciés ;
Tot le destrencherent les sies,
De son cors firent dix parties.
