Cette page a été validée par deux contributeurs.
Vers Dacien s’en est venue
Et dist : « A Deu me sui rendue,
En bon Deu en cui Jorge creit
Qui tot fist, tot seit et tot veit. »
Daciens forment lors s’escrie :
« Hai ! raine Alexandrie,
Par son barat t’a esméue
Jorge, et t’a forment decéue ;
Lairas-tu ton regne et ta sale
Et morras de mort greve et male ? »
Si ele respont sinplement
Et si li a dit humlement :
« Por Deu, mon seignor et mon maistre,
Voil-je morir, ne puet autre estre,
De s’amor ne puet decevrer,
Nul tant puisse mon cors grever. »
aciens plore et mult s’esmaie,
Mult la prie, mult la sosplaie :
« Oh ! doce raine, que ferai ?
Coment morrir te sofferai ?
