A moi une dame là vint
Où j’estoie, en celle tornelle,
Qui moult gracieuse iert et belle
De cors, de membres et de vis,
Mais il me fu moult bien avis
Qu’elle fust tristre et esmarie,
Et nonpourquant moult devint lie
Quant ileuc me vit en ce point ;
Car à moi vint, ne targa point,
Et moult très debonnairement
Demanda de mon errement,
Que je là faisoie et qui iere,
Et si me dist : — « A quel matere
Penses tu, compains, biaus amis ;
Di moi qui en ce point t’a mis
Que tu ne dors ne tu ne veilles. »
— « Par foi, dame, ce sont merveilles
Telles qu’ains si grandes ne vi,
Comment ont tel fait asouvi
Ces dames qui en gardecors,
Sans armeüres ont les cors
Fors seulement que d’un escu.
Moult en ai le cuer irascu,
Trespensé et moult esmari,
Car chascune a chi son mari
Mis à merchi et abatu
Des chevaus, et si bien batu
Qu’il ont tout prison fianchie.
Qui saroit que ce senefie,
Volentiers dire li orroie. »
— « Biaus compains, se je chi avoie