Point de paine à lui revengier,
Ne ne veult pechié desdaignier.
Seignorir doit et elle sert ;
C’est grant pitiez, qu’elle desert
Que la chars la met à merci,
Ainssi con tu le vois ici.
Ces fors chevaliers aterrez
Hors de foi sont et desperez ;
Point ne se metent à desfense
Vers leur fames ; chascuns ne pense
Fors à li lessier couvenir.
Ainssi ne puet on pas venir
A la grace Dieu ne des sains.
Il sont armé, haitié et sains,
Mès ce n’est que de lascheté
Qu’ensi sont à terre geté
Li pluseur, mat et desconfis.
Or en soies certains et fis
Que la haute honneur n’aquerront
Cil qui ou servage cherront
De leur chars ne des grans pechiez,
Ainz en sousferra les meschiez
La lasse ame, et la grant doulour.
Elle comparra la folour,
Ainssi con tu le pues veoir,
De ce que si poi de pooir
Mist en lui garder et desfendre
Et à bien faire. Or pues entendre
Comment la chars par trop pechier
Fait l’ame en enfer trebuschier
Et les desconfit par l’envie
Page:Watriquet de Couvin - Dits, édition Scheler, 1868.djvu/273
Apparence
Cette page a été validée par deux contributeurs.