Nonpourquant chascuns y aloit
Et venoit aussi asseür
Que fortune ne meseür
Ne redoutoient tant ne quant ;
Et s’en cheoient li auquant
Et versoient chà .i., chà deus ;
En ce flun parfont et hideus
Leur escot payer en aloient.
Et cil qui à l’ueil les veoient
Ainssi tumber à tel meschief,
Les oublioient de rechief ;
Tantost ne leur en souvenoit.
Chascuns seur che pont maisonnoit ;
Li un tours, maisons et chastiaus,
Sales de pierre et à crestiaus ;
Li autre, de lonc et de lé,
Y avoient amoncelé
Touz les biens qu’il porent avoir.
Onques pont si garni d’avoir
N’oi mais veü en tout mon tans,
Mais il estoit cent mille tans
Plus perilleus que je ne di,
Car à veoir moult entendi
Les piliers, qui prés tout affait
Erent pourri d’yave et desfait ;
Onques ouvriers paine endurer
Ne volt au fondement murer,
Ains erent toutes les ataches,
Poutres et piliers et estaches
De sec bois mauvais et pourri,
Si qu’entor de paour couri
- ↑ garnis. — B. Onques pons si garnis d’avoir
Ne fu mais veüz à mon tanz.