Diex aide à soustenir son droit.
Prouver le poons chi endroit
Et de l’example estre touz fis
Au lyon qui est desouz mis
D’un aignel et mis à outrance ;
C’est bien droite senefiance.
Ainssi avient, qui que le conte,
Soit de roy, de duc ou de conte :
Quant, par orgueil qui le sorprent,
Guerre à tort sour autrui emprent
Et croit trop son felon corage,
Mainte fois li tourne à domage
Sa fole erreurs et à meschief,
Combien que il venist à chief
De plus grant emprise cent tans.
Si ne doit nus estre asentans,
Tant voie haut sa queue luire,
A autrui grever ne destruire,
S’à juste cause ne le fait,
Car lui ou les siens en desfait
Et en est audesouz tournez
Maintes fois ses tours bestournez,
Et de son cop mesme s’abat.
Quant par son grant orgueil s’embat
Seur autrui par sa foie emprise
Et plus son pooir que Dieu prise,
Si qu’il n’a arroi ne mesure
Ne ne prent garde à mespresure
Qu’il en prengne amende de lui,
Ne il n’a fiance qu’en lui
Et en son pooir seulement, —
Je te di qu’à lui est briément
A droit comparez li lyons
Page:Watriquet de Couvin - Dits, édition Scheler, 1868.djvu/290
Cette page a été validée par deux contributeurs.
![](http://upload.wikimedia.org/wikipedia/commons/thumb/2/2d/Watriquet_de_Couvin_-_Dits%2C_%C3%A9dition_Scheler%2C_1868.djvu/page290-1024px-Watriquet_de_Couvin_-_Dits%2C_%C3%A9dition_Scheler%2C_1868.djvu.jpg)