Poème de la prison/Ballade XIX
Douleur, Courroux, Desplaisir et Tristesse
Quelque tourment que j’aye main et soir.
Ne pour doubte de mourir de destresse,
Jà ne sera en tout vostre povoir
De me changier le tresloyal vouloir
Qu’ay eu tousjours de la belle servir
Par qui je puis et pense recevoir
Le plus grant bien qui me puist avenir.
Quant j’ay par vous aucun mal qui me blesse,
Je l’endure par le conseil d’Espoir
Qui m’a promis qu’à ma seule maistresse
Lui fera brief mon angoisse savoir.
En lui mandant qu’en faisant mon devoir,
J’ay tout les maulx que nul pourroit souffrir.
Lors trouveray, je ne sçay s’il dist voir,
Le plus grant bien qui me puist avenir.
Ne m’espargniez donc en rien de rudesse,
Je vous feray bien brief appercevoir
Qu’auray secours d’un confort de Lyesse.
Long temps ne puis en ce point remanoir,
Pource je metz du tout à non chaloir
Les tresgrans maux que me faittes sentir.
Bien aurez dueil, se me voyez avoir
Le plus grant bien qui me puist avenir.
Je suy cellui au cueur vestu de noir
Qui dy ainsi, qui que le vueille ouyr :
J’auray briefment, Loyaulté m’en fait hoir,
Le plus grant bien qui me puist avenir.