Poème de la prison/Ballade XV
Belle que je tiens pour amye,
Pensés, quelque part que je soye,
Que jamais je ne vous oublie ;
Et pource prier vous vouldroye,
Jusques atant que vous revoye,
Qu’il vous souviengne de cellui
Qui a trouvé peu de mercy
En vous, se dire je l’osoye.
Combien que je ne dye mie
Que n’aye receu bien et joye,
En vostre doulce compaignie.
Plus que desservir ne saurove,
Non pour tant, voulentiers j’auroye
Le guerdon de loyal amy,
Qu’oncques ne trouvay jusqu’à cy
En vous, se dire je i’osoye.
Je vous ai longuement servie,
Si m’est advis qu’avoir devroye
Le don que de sa courtoisie
Amour à ses servans envoye ;
Or faittes qu’estre content doye,
Et m’accordez ce que je dy,
Car trop avez Refus nourry
En vous, se dire je I’osoye.