Poème de la prison/Ballade XVI
Ma Dame, vous povez savoir
Les biens qu’ay euz à vous servir ;
Car, par ma foy, pour dire voir,
Oncques je n’y peuz acquerir
Tant seulement un doulx plaisir,
Que, sitost que je le tenoye,
Dangier le me venoit tolir
Ce peu de plaisir que j’avoye.
Je n’en savoye nul avoir
Qui peust contenter mon desir,
Se non quant vous pouvoye voir,
Ma joye, mon seul souvenir.
Or m’en a fait Dangier bannir,
Tant qu’il faut que loing de vous soye,
Parquoy a fait de moy partir
Ce peu de plaisir que j’avoye.
Non pas peu, car de bon vouloir
Content m’en devoye tenir.
En esperant de recevoir
Un trop plus grant bien advenir ;
Je n’y cuidoye point faillir,
À la paine que g’y mettoye ;
Cela me faisoit enrichir
Ce peu de plaisir que j’avoye.
Belle, je vous vueil requérir,
Pensés, quant serés de loisir,
Qu’en grant mal, qui trop me guerroye,
Est tourné, sans vous en mentir,
Ce peu de plaisir que j’avoye.