Poème de la prison/Ballade XXII
Belle, combien que de mon fait,
Je croy qu’avez peu souvenance,
Toutesfois se savoir vous plaist
Mon estat et mon ordonnance,
Sachiés que loingtain de Plaisance,
Je suis de tous maulx bien garny.
Autant que nul qui soit en France,
Dieu scet en quel mauvais party.
Helas ! or n’ay je rien forfait
Dont porter je doye penance,
Car tousjours je me suis retrait
Vers Léauté et Espérance,
Pour acquérir leur bien vueillance ;
Mais au besoing ilz m’ont failly
Et m’ont laissié, sans recouvrance,
Dieu scet en quel mauvais party.
Dangier m’a joué de ce trait,
Mais se je puis avoir puissance,
Je feray, maugré qu’il en ait,
Encontre lui une aliance ;
Et si lui rendray la grevance,
Le mal, le dueil et le soussy,
Où il m’a mis jusqu’à oultrance,
Dieu scet en quel mauvais party.
Aydiez moy à l’oultrecuidance
Vengier, com en vous ay fiance,
Ma Maistresse, je vous supply,
De ce faulx Dangier qui m’avance
Dieu scet en quel mauvais party.