Poème de la prison/Ballade XXI
Loué soit cellui qui trouva
Premier la manière d’escrire ;
En ce, grant confort ordonna
Pour amans qui sont en martire ;
Car quant ne pevent aler dire
À leurs dames leur grief tourment,
Ce leur est moult d’alegement
Quant par escript pevent mander
Les maulx qu’ilz portent humblement,
Pour bien et loyaument amer.
Quant un amoureux escrira
Son dueil, qui trop le tient de rire,
Au plus tost qu’envoyé l’aura
À celle qui est son seul mire.
S’il lui plaist à la lettre lire,
Elle peut véoir clerement
Son doloreux gouvernement.
Et lors Pitié lui scet monstrer
Qu’il dessert bon guerdonnement,
Pour bien et loyaument amer.
Par mon cueur je congnois pieçà
Ce mestier, car quant il soupire,
Jamais rapaisié ne sera
Tant qu’il ait envoyé de tire
Vers la belle que tant desire.
Et puis s’il peut aucunement
Oïr nouvelles seulement
De sa doulce beauté sans per,
Il oublie l’ennuy qu’il sent
Pour bien et loyaument amer.
Ma Dame, Dieu doint que briefment
Vous puisse de bouche compter
Ce que j’ay souffert longuement
Pour bien et loyaument amer.