Poème de la prison/Ballade XXXI
Venés vers moy, Bonne Nouvelle,
Pour mon las cueur reconforter,
Contez moy comment fait la belle,
L’avez vous point oy parler
De moy, et amy me nommer ?
A elle point mis en oubly
Ce qu’il lui pleut de m’acorder,
Quant me donna le don d’amy ?
Combien que Dangier, le rebelle,
Me fait loing d’elle demourer.
Je congnois tant de biens en elle
Que je ne pourroye penser
Que tousjours ne vueille garder
Ce que me promist sans nul sy,
Faisant noz deux mains assembler,
Quant me donna le don d’amy.
Pitié seroit, se Dame telle,
Qui doit tout honneur desirer,
Failloit de tenir la querelle
De bien et loyaument amer.
Son sens lui scet bien remonstrer
Toutes les choses que je dy
Et ce qu’Amour nous fist jurer
Quant me donna le don d’amy.
Loyauté, vueilliez asseurer
Ma Dame que sien suy, ainsi
Qu’elle me voulu commander.
Quant me donna le don d’amy.