Poème de la prison/Ballade XXXII
Belle, s’il vous plaist escouter
Comment j’ay gardé en chierté
Vostre cueur qu’il vous pleut laissier
Avec moy, par vostre bonté,
Sachiés qu’il est enveloppé
En ung cueuvrechief de Plaisance,
Et enclos, pour plus grant seurté,
Ou coffre de ma souvenance.
Et pour nettement le garder,
Je l’ay souventesfois lavé
En lermes de Piteux Penser ;
Et regrettant vostre beauté,
Après ce, sans delay porté,
Pour sechier, au fou d’Espérance,
Et puis doulcement rebouté
Ou coffre de ma souvenance.
Pource, vueillez vous acquitter
De mon cueur que je vous ay donné,
Humblement vous en vueil prier,
En le gardant en loyauté,
Soubz clef de Bonne Voulenté,
Comme j’ay fait, de ma puissance,
Le vostre que tiens enfermé
Ou coffre de ma souvenance.
Ma Dame, je vous ay compté
De vostre cueur la gouvernance,
Comment il est et a esté
Ou coffre de ma souvenance.