Poème de la prison/Ballade XXXIV
Mon cueur, ouvrez l’uis de Pensée,
Et recevez un doulx présent
Que la tresloyaument amée
Vous envoye nouvellement,
Et vous tenez joyeusement ;
Car, bien devez avoir liesse.
Quant la trouvez sans changement
Tousjours tresloyalle maistresse.
Bien devez prisier la journée
Que fustes sien premierement ;
Car sa grace vous a donnée,
Sans faintise, tresloyaument ;
Vous le povez veoir clerement,
Car elle vous tient sa promesse,
Soy monstrant vers vous fermement
Tousjours tresloyalle maistresse.
Par vous soit doncques honnourée
Et servie soingneusement,
Tant comme vous aurez durée,
Sans point faire departement ;
Car vous aurez certainement,
Par elle des biens à largesse.
Puis qu’elle est si entierement
Tousjours tresloyalle maistresse.
Grans mercis des fois plus de cent,
Ma Dame, ma seule Princesse,
Car je vous treuve vrayement
Tousjours tresloyalle maistresse.