Quand je vais contemplant la divine beauté
Seconde partie des Muses françoises, Texte établi par Despinelle, chez Matthieu Guillemot, (p. 229).
SONNET.
Qvand ie vai contemplant la diuine beauté
Dont le Ciel trop prodigue a paré voſtre face,
Et quand d’autre coſté i’admire voſtre glace,
Surion perpetuel de voſtre cruauté,
Ie veux d’vn cœur ardant bannir ma loyauté,
Cueillant du deſespoir vne mortelle audace,
Et mon poignard hauſſé inuocque voſtre grace
Preſt à payer les droits de voſtre royauté.
Mais helas ! balançant & la mort & la vie,
Ie vous voy dans mon ſein, d’où ie perds toute enuie
D’offenſer le pourtraict du Seigneur de mon ſort :
Ainsi la meſme face a vn effect contraire,
Elle retient mon bras quand je me veux défaire,
Et lorſque je veux viure, elle auance ma mort.
A. D. V.