Cop. – Biblioth. de Tours, ancien manuscrit des Carmes, coté M, no 50, Lettres historiques, p. 3. Communiqué par M. le préfet.
Madame, Je ne doubte point qu’on n’ayt diversement parlé de l’assemblée qui a esté faicte en ceste ville, et c’est pourquoy j’envoye le sr de [Lezignan] vers le Roy, mon seigneur, pour l’esclaircir et asseurer qu’il n’y a esté rien traicté en icelle que pour le bien de son service et entretenement de l’edict de paix. Je l’ay chargé, Madame, de passer vers vous, pour vous supplier trez humblement vouloir entendre les plainctes de ceulx de la Religion, afin, s’il vous plaist, moyenner qu’on leur en face justice, et trouver bon que j’aye embrassé leurs plainctes, comme chose que je juge trez necessaire au repos de ce Royaulme, et accompaigner voz intentions auxquelles je desire me conformer tant que je vive. Me remectant sur ledict de [Lezignan] de ce qui y concerne le mareschal de Bellegarde[1] et l’occasion du voyage de Calignon par deçà. Vous suppliant encores un coup, Madame, de prendre asseurance que je ne me propose rien tant que de voir ce Royaulme en ung repos asseuré, et Voz Majestez obeies ; priant Dieu m’en faire la grace et vous donner, Madame, en parfaicte santé, trés heureuse et longue vie.
serviteur et fils,
- ↑ Ces noms, dans le manuscrit, sont représentés seulement par initiales ; mais la lettre suivante à Monsieur ne laisse pas d’incertitude sur cet endroit, non plus que la lettre à la reine mère, du 29 juillet.