Orig. – Arch. du Royaume, section historique, série M, dossier Saint-Ours.
Monsr de la Bourelies, À present que la paix est conclue et arrestée, je fais estat de m’en aller en Flandres avec les meilleures troupes que je pourray assembler de mes bons amys et affectionnez serviteurs, pour ayder et servir au bien et avancement des affaires de Monsieur[2]. Et d’aultant que vous estes du nombre de ceulx de la bonne volonté et affection desquels je m’asseure le plus et en qui j’ay plus de confiance, j’ay estimé que la me vouldrés faire paroistre en ceste occasion, qui est si belle pour toutes personnes qui veulent acquerir et accroistre leur reputation, que cela vous y doibt exciter encores plus. Je vous prie donc m’accompagner en ce voyage et vous y preparer, et, si telle est vostre intention, m’en advertir, afin que j’en puisse faire estat ; et vous asseurer que je n’auray jamais moyens quelconques, que je ne vous y feray part, pour recongnoistre le bon office que je me promets de vous en ceste occasion, en esperant que ne me vouldrez esconduire. Et je prieray Dieu, Monsr de la Bourelies, vous avoir en sa saincte garde.
De Coutras, ce xije jour de decembre 1580.