Orig. — Arch. de M. le comte H. C. de Meslon. Envoi de M. le secrétaire général du département de la Gironde.
Meslon, J’ay eu advis que, depuis l’arrivée du mareschal de Biron à Duras[1], quelques soldatz ont donné de nuict jusques sur le fossé de Montsegur, et estans descouvertz se sont retirez avec serment de n’entreprendre jamais sur aucune place. Qui desmonstre qu’ils ont eu commandement d’entreprendre sur ceste-cy et plusieurs aultres ; tellement que tous ceulx de la dicte ville en furent l’autre jour grandement alarmez. Je m’estonne que ne m’en avez adverty et que vous n’estes plus souvent en la dicte ville, au temps mesme que vous voyez telles assemblées. À ceste cause, je vous prye ne faire faulte de vous y rendre incontinent, et prendre soigneusement garde qu’il n’en advienne faulte. C’est de vostre charge, et vostre debvoir ; qui me gardera vous en dire davantage, pour prier Dieu, Meslon, vous avoir en sa saincte et digne garde. De Nerac, ce xve juillet 1581.
- ↑ Petite ville de l’Agénois, aujourd’hui chef-lieu de canton du département de Lot-et-Garonne.