Orig. — Arch. de M. le comte Henry de Bouffard de Gandels. Envoi de M. Moquin-Tandon, professeur à la Faculté des sciences de Toulouse.
Monsr de la Garrigue, Je suis tellement affectionné à ce qui touche le bien et advancement des esglises reformées de ce Royaulme, qu’il ne se sçauroit presenter occasion quelconque de leur en faire demonstration, que je n’y apporte tous les moyens que je penseray leur pouvoir tant soit peu servir ; envoyant mesme le sr du Pin, mon secretaire d’Estat, present porteur, exprès pour cest effect en voz quartiers. Auquel j’ay mis charge de vous faire entendre quelques particularitez, desquelles je vous prie le croire comme moy-mesme, qui, me reposant en cela sur sa suffisance, ne vous feray celle-cy plus longue, sinon pour vous asseurer de mon amitié, sur effect de laquelle je vous feray tousjours paroistre, où j’auray moyen de m’employer pour vous, d’aussy bon cœur que je prie Dieu vous avoir, Monsr de la Garrigue, en sa saincte garde. À Nerac, ce xviije jour de septembre 1581.