Recueil général et complet des fabliaux des 13e et 14e siècles/XXI
XXI
DU FEVRE DE CREEIL.
r entendez .I. petitet,
N’i ferai mie grant abet.
Uns fèvres manoit à Creeil[2],
Qui por batre[3] le fer vermeil,
Quant l’avoit trait du feu ardant,
Avoit aloué .I. serjant
Qui moult estoit preus et legiers.
Li vallés avoit non Gautiers ;
Moult ert deboneres et frans,
Les rains larges, grailes les flans,
Gros par espaules et espès,
Et si portoit du premier mès
Qu’il covient aus dames servir,
Quar tel vit portoit, sanz[4] mentir,
Qui moult ert de bele feture,
Quar toute i ot mise sa cure
Nature qui formé l’avoit ;
Devers le retenant avoit
Plain poing de gros et .II. de lonc ;
Jà li treus ne fust si bellonc,
Por tant que dedenz le méist,
Qu’aussi roont ne le féist
Com s’il fust fèz à droit compas.
Et des mailliaus ne di-je pas
Qui li sont au cul atachié,
Qu’il ne soient fet et taillié
Tel com a tel ostil covient.
Tozjors en aguisant se tient
Por retrère delivrement,
Et fu rebraciez ensement
Come moines qui jeté aus poires,
Ce sont paroles toutes voires,
Rouges come oingnon de Corbueil[5] ;
Et si avoit si ouvert l’ueil
Por rendre grant plenté de sève,
Que l’en li péust une fève
Lombarde irès parmi lancier
Que jà n’en lessast son pissier,
De ce n’estuet-il pas douter,
Ne que une oue à gorgueter
S’ele éust mengié un grain d’orge.
Li vallés, qui maintient la forge
D’une part avoec son seignor,
Ne péust pas trover meillor
En la vile de ce mestier.
Bien ot esté .I. an entier
Avoec le fèvre li vallés,
Que de lui servir estoit prés.
Un jor avint qu’il fu à roit,
Et que son vit fort li tendoit ;
Ses sires le trova pissant,
Et vit qu’il ot .I. vit si grant,
De tel façon et de tel taille,
Com je vous ai conté sanz faille
Et pensa, se sa fame set,
Qui tel ostil mie ne het
Come Gautiers lor serjant porte,
Ele voudroit miex estre morte
Qu’ele ne s’en féist doner.
Par tens la voudra esprouver ;
A sa feme vient, si a dit :
« Dame, fet-il, se Diex m’aït.
Je ne vi onques si grant membre.
Que je sache ne que moi membre,
Come a Gautiers nostre serjanz ;
Quar, se ce fust uns granz jaianz.
Si en a-il assés par droit ;
Merveille est quant il est à roit ;
Je le vos di tout sanz falose.
Quar parlez à moi d’autre chose,
Fet cele, cui semble qu’el hée
Ce dont ele est si enbrasée ;
Quar, par la foi que je vos doi,
Se plus en parlez devant moi.
Je ne vous ameroie mie ;
Tel honte ne tel vilonie
Ne devroit nus preudom retrère. »
Li fèvres ne s’en vout pas tère
De loer le vit au vallet ;
Plus que devant s’en entremet.
Et dist qu’en tel ostil ouvrer
Ne sot miex Nature esprover
Qu’en rien que ele onques féist :
« Dame, fet-il, se Diex m’aït,
Onque mès hom de mère nez
Ne fut de vit si racinez,
Dame, fet-il, comme[6] est Gautiers ;
Je croi qu’il fout moult volentiers.
— Sire, fet-el, à moi que touche ? »
Qui bien savoit dire de bouche
Le contraire de son corage ;
Mès moult bien pert à son visage
Que sovent color mue et change.
Jà de sens ne fust si estrange
Home qui garde s’en préist,
Qui bien ne séust et véist
Que talent en ot fort et aspre.
Une eure est plus blanche que nape,
Autre eure plus rouge que feus.
« Certes, moult estes anieus.
Qui si parlez vilainement ;
Je vous avoie bonement
Proie que vous vous téussiez ;
Bien tère vous en déussiez.
— Ma dame, puisque il vous plest.
Je m’en terai ». Atant se test.
« Or lais ceste parole ester.
Dame, fet-il sanz arester.
M’en irai à saint Leu demain ;
Prenez du feu, fetes à plain
Gautier nostre serjant ouvrer. »
Or faisoit samblant de l’errer,
Si s’est souz la forge repus.
La dame s’est levée sus,
Et prent du feu, porte à Gautier,
Et cil comença à forgier,
Qui moult fu sages et soutiz.
« Gautier, fet-ele, tes ostiz
Est-il ores tels que l’en dit,
Quant est à roit, se Diex t’aït.
De la besoingne fere près ?
Tesiez, Dame, fet li vallès,
Qui grant honte a et grant vergoingne ;
Parlez à moi d’autre besoingne,
De ce ne vous rendrai-je conte.
— Par Dieu, fet-ele, riens ne monte,
Quar il estuet que je le voie
Orendroit sanz point de delaie,
Par couvent[7] que mon con verras :
Sez-tu quel loier en auras ?
Chemise et braies deliées.
Bien cousues et bien tailliées. »
Quant li vallés ot la promesse.
Si trait le vit, dont une anesse
Péust bien estre vertoillie.
Cele, qui estre en veut brochie.
Se descuevre jusqu’au nombril :
« Gautier, fet-ele, à ton ostil
Fai mon con besier une foiz,
Quar il est bien reson et droiz ;
Ne s’entrevirent onques mès ;
Si prendront l’uns à l’autre pès. »
Le vit fut roides com pel ;
Si atasta s’il i ot sel,
Et si fu près de hurter enz.
Mais li fèvres ne fu pas lenz ;
De derrier la forge est saillis
Et s’escria à moult hauz criz :
« Sire vassal, traiez en sus ;
Par mon chief, vous n’en ferez plus
Que fet avez, vostre merci ;
Ne remaint pas n’en vous n’en li
Que grant honte ne m’avez faite :
Vostre services ne me haite,
Ne ne me plest d’ore en avant ;
Alez-vous-en, jel vous comant,
Que vous n’entrez jamés céenz. »
Gantiers s’en part triste et dolenz,
Et la dame remest penssive,
Et li sires à li estrive :
« Par Dieu, fet-il, de grant ardure
Vous venoit et de grant luxure ;
Vous ne le poez pas noier.
Que vous voliez bien que Gautier
Lessast les oeuvres de ses mains
Por marteler desus vos rains ;
Jà en aurez vo guerredon. »
Lors avoit pris un grand baston.
Si la vous commence à paier,
Si que les os li fet ploier.
Se li a tant de cops donez
Qu’il est sor li trestoz lassez.
Par cest example voil moustrer
C’on doit ainçois le leu huer
Des bestes qu’il y soit venuz.
Se li fèvres se fust téuz,
Que Gautiers éust bouté enz,
La dame éust fait ses talenz.
A cest mot finerons[8] no conte.
Que Diex nous gart trestoz de honte.
- ↑ XXI. — Du Fevre de Creeil, p. 231.
Publié par Barbazan, III, 218 ; et par Méon, IV, 265-271.
- ↑ Vers 3 — « Creeil », « Creil », en Picardie (Oise).
- ↑ 4 — battre, lisez batre.
- ↑ 14 — San, lisez sanz.
- ↑ 33 — « Corbueil », « Corbeil » (Seine-et-Oise).
- ↑ 87 — com, lisez comme.
- ↑ 129 — convent, lisez couvent.
- ↑ 179 — fineront, lisez finerons.
Ce conte se retrouve dans Malespini, dans l’Enfant sans souci et dans les Cent Nouvelles nouvelles (nouv. 85).