Recueil général et complet des fabliaux des 13e et 14e siècles/XXIV
XXIV
LE FLABEL D’ALOUL.
ui d’Aloul veut[2] oïr le conte,
Si com l’estoire nous raconte,
Sempres en puet assez oïr.
S’il ne le pert par mesoïr.
Alous estoit uns vilains riches.
Mès moult estoit avers et ciches,
Ne jà son vueil n’éust jor bien ;
Deniers amoit seur tote rien,
En ce metoit toute s’entente.
Fame avoit assez bele et gente,
Novelement l’ôt espousée,
C’uns vavassors li ot donée
Por son avoir d’iluec entor.
Alous l’amoit de grant amor.
Ce dist l’escripture qu’Alous
Garde sa fame com jalous.
Male chose a en jalousie.
Trop a Alous mauvèse vie,
Quar ne puet estre asséurez ;
Or est Alous toz sos provez,
Qui s’entremet de tel afère.
Or a Alous assez à fère,
S’ainsi le veut gaitier toz jors.
Or escoutez come il est lors.
Se la dame va au moustier,
Jà n’i aura autre escuier,
Coment qu’il voist, se Aloul non,
Qui adès est en soupeçon
Qu’ele ne face mauvés plet.
A la dame forment desplest,
Quant ele premiers l’aperçoit ;
Lors dist que s’ele nel deçoit,
Dont sera-ele moult mauvaise,
Se lieu en puet avoir et aise.
Ne puet dormir ne jor ne nuit ;
Moult het Aloul et son déduit ;
Ne scet que face, ne conment
Ele ait pris d’Aloul vengement,
Qui le mescroit à si grant tort ;
Peu repose la dame et dort.
Longuement fu en cel escil,
Tant que li douz mois fu d’avril,
Que li tens est souez et douz
Vers toute gent, et amorouz ;
Li roxingnols la matinée
Chante si cler par la ramée
Que toute riens se muert d’amer.
La dame s’est prise à lever,
Qui longuement avoit veillié ;
Entrée en est en son vergié ;
Nus piez en va par la rousée ;
D’une pelice ert afublée,
Et .I. grant mantel ot deseure.
Et li prestres en icele eure
Estoit levez par .I. matin ;
Il erent si très près voisin,
Entr’aus deux n’avoit c’une selve.
Moult ert la matinée bele,
Douz et souez estoit li tens,
Et li prestres entra léenz,
Et voit la dame au cors bien fet.
Et bien sachiez que moult li plest,
Quar volentiers fiert de la crupe ;
Ainz i metroit toute sa jupe
Que il n’en face son talent.
Avant s’en va tout sagement,
Com cil qui n’est pas esmaiez :
« Dame, fet-il, bonjoraiez ;
Por qu’estes si matin levée ?
— Sire, dist-ele, la rousée
Est bone et saine en icest tans,
Et est alegemenz moult granz,
Ce dient cil fusicien.
— Dame, dist-il, ce cuit-je bien,
Quar par matin fet bon lever ;
Mès l’en se doit desjéuner
D’une herbe que je bien connois[3] ;
Vez le là près, que je n’i vois ;
Corte est et grosse la racine,
Mès moult est bone medecine ;
N’estuet meillor à cors de fame.
— Sire, metez outre vo jambe,
Fet la dame, vostre merci,
Si me moustrez si ele est ci.
— Dame, fet-il, iluec encontre. »
A tant a mise sa jambe outre ;
Devant la dame est arestez ;
« Dame, dist-il, or vous séez,
Quar au cueillir i a mestrie. »
Et la dame tout il otrie,
Qui n’i entent nule figure.
Diex, c’or ne set cele aventure
Alous, qui en son lit se gist !
La dame isnelement s’assist ;
Ses braies avale li prestres,
Qui de ce fère estoit toz mestres ;
La dame enverse, si l’encline,
Bien li aprent la medecine,
Et ele vuisque sus et jus.
« Sire, fet-ele, levez sus,
Fuiez de ci ; Diex ! que ferai ?
Jamès prestre je ne croirai. »
Et li prestres resaut en piez,
Qui moult estoit bien aaisiez.
« Dame, dist-il, or n’i a plus.
Vostre amis sui et vostre drus,
Dès or vueil tout vostre gré fère.
— Sire, dist-ele, cest afère
Gardez que soit cele moult bien,
Et je vous donrai tant du mien.
Que toz jors mes serez mananz.
Foi que doi vous, bien a deux anz
Qu’Alous me tient en tel destrèce,
Qu’aine puis n’oï joie ne léèce,
Et si est tout par jalousie ;
Si en haz moult, sachiez, sa vie,
Quar mainte honte m’en a fète.
Fols est qui fame espie et guète.
Dès or mès porra dire Alous,
Si dira voir, que il est cous.
Dès or vueil estre vostre amie.
Quant la lune sera couchie,
Adonc venez sans demorée,
Et je vous serai aprestée
De vous reçoivre et aaisier.
— Dame, ce fet à mercier,
Fet li prestres, vostre merci ;
Departons-nous hui mes de ci,
Que n’i sorviengne[4] dans Alous ;
Penssez de moi et je de vous. »
A tant s’en partent enes l’eure ;
Chascuns s’en va, plus n’i demeure ;
Cele revint à son mari,
Qui moult avoit le cuer mari.
« Dame, fet-il, d’ont venez-vous ?
— Sire, fet-el, de là desous,
Dist la dame, de cel vergié.
— Conment, fet-il, sanz mon congié ?
Poi me doutez, ce m’est avis. »
Et la dame se test toz diz,
Que de respondre n’avoit cure.
Et Alous se maudist et jure,
S’une autre foiz li avenoit,
Honte et ledure li feroit.
Atant remest, s’est saillis sus,
Trestoz penssis et irascus ;
Moult se doute de puterie ;
Bien le demaine jalousie,
Qui de lui fet tout son voloir.
Çà et là vait par son manoir
Savoir s’il i avoit nului
A cui sa fame éust mis lieu,
Tant qu’il s’en entre en .I. jardin.
Douz tens fesoit et cler matin,
Et garde et voit que la rousée
I estoit auques defoulée
De lieu en lieu par le vergié ;
S’en a son cuer forment irié.
Avant en vait en une place,
Iluec endroit li piez li glace,
Que sa fame fu rafetie,
Por son pié qui ainsi li glie ;
Il esgarde tout environ,
Et vit le leu où li talon
Erent hurté et li orteil.
Or est Alous en mal trepeil,
Quar il set bien tout à fiance,
Et li leus li fet demoustrance
Que sa fame a esté en œvre.
Ne set conment il se descuevre,
Quar n’en veut fère renommée,
S’ert la chose miex esprovée,
Et plus apertement séue.
Or est la dame decéue,
S’ele ne se set bien gaitier.
À tant est pris à anuitier :
Alous en sa meson repère ;
Ne veut sa fame samblant fère
Que de rien l’ait apercéue.
La mesnie est au feu venue,
Si se sont au mengier assis ;
Après mengier ont fet les lis,
Si sont couchié tuit li bouvier,
Et Alous s’en revait couchier,
Il et sa fame maintenant.
« Dame, fet-il, couchiez devant,
Delà devers cele paroit,
Quar je leverai orendroit
Por ces bouviers fère lever,
Jà sera tans d’en champ aler
Por noz terres à gaaignier.
— Sire, vous i irez premier,
Fet la dame, vostre merci,
Quar je me dueil certes ici
Sor ceste hanche ci endroit ;
Je croi que clous levez i soit,
Quar je en sui à grant malaise. »
Atant Alous la dame apaise,
Que couchiez est et ele après ;
Mès ne l’a or guetié si près,
Que l’uis ne soit ouvers remez.
Or est Alous moult enganez,
Quar il s’en dort isnel le pas.
Et li prestres vient, pas por pas,
Tout droit à l’uis, desferm[5] le trueve,
Puis boute .I. poi, et puis si l’uevre,
De toutes pars bien le compisse.
Or avoit el mèz une lisse
Qui fesoit grant noise et grant brait ;
Et li prestres el n’en a fait,
La charnière va compissier,
Quar n’a cure de son noisier.
Quant le prestre aperçoit et sent,
Vers lui lest corre, si destent[6],
Si le saisit par son sorcot ;
Se li prestres n’esrast si tost
Dedenz la chambre, à icele eure
Defors fust maie la demeure.
Tout souef oevre l’uis et clot,
Et la lisse dehors reclot,
Quar n’a cure de son noisier ;
Moult het la lisse et son dangier.
Qu’aine ne fist bien gent de son ordre,
Adès les veut mengier et mordre.
Or est li prestres derrier l’uis,
Mès il est plus de mienuis.
Si s’est .I. poi trop atargiez,
Quar Alous se r’est esveilliez,
Qui longuement ot traveillié
Por .I. songe qu’il ot songié ;
S’en est encor toz esbahis,
Quar en sonjant li est avis
C’uns prestre en la chambre est entrez,
Toz rooingniez et coronez,
S’avoit sa fame si sorprise,
Et si l’avoit desouz lui mise
Qu’il en fesoit tout son voloir,
Et Alous n’avoit nul pooir
Qu’il li péust aidier ne nuire,
Tant c’une vache prist à muire,
Qui Aloul gete de s’error.
Mès encore ert en grant fréor.
Sa fame acole, si l’embrace,
N’a cure que nus tort l’en face :
Par la mamele prent s’amie,
Et sachiez qu’ele ne dort mie,
Dès or mès en veut prendre garde.
Et li prestres pas ne se tarde ;
Vait, pas por pas, tout droit au lit,
Où Alous et sa fame gist.
Ele est forment en grant tormente ;
Fet-ele : « Come gis à ente ;
Ostez vo braz qui seur moi gist ;
Traiez en là ; j’ai poi de lit,
A paine puis r’avoir mes jambes.
— Diex ! dist Alous, qu’estuet ces fames ? »
Par mautalent est trais en sus,
Et li prestres est montez sus ;
Tost li a fet le ravescot.
Et Alous se retorne et ot
Que li lis croist, et crisne, et tramble.
Avis li est que on li amble ;
De sa fame est en grant soloit,
Quar ainsi fère ne soloit.
Sa main gete desus ses draz,
Le prestre sent entre ses braz ;
A tant se va atapissant,
Et par tout le va portastant,
Quar à grant paine se puet tère.
Le prestre prent par son afère,
Et sache, et tire, et huche et crie :
« Or sus, fet-il, or sus, mesnie ;
Fil à putain, or sus, or sus !
Céenz est ne sai qui venus
Qui de ma fame m’a fet cop. »
Et la dame parmi le cop
Saisi Aloul, et par la gueule :
Li prestres de sa coille veule
Les dois par force li dessere,
Et sache si qu’il vint à terre
Enmi la chambre sor .I. aistre.
Or a le prestre esté à maistre,
Moult a souffertes granz dolors ;
Cui chaut, quant c’est tout par amors.
Et por fère sa volenté ?
A tant sont li bouvier levé ;
L’un prent tinel, l’autres maçue,
Et li prestres ne se remue,
Sempres aura le col carchié,
A ce que il sont moult irié
Por lor seignor qui ainsi crie ;
Toute est levée la mesnie ;
Cele part corent et vont tuit.
Or n’a li prestres de réduit,
Fors tant qu’il entre en .I. toitel
Où brebis gisent et aignel ;
Iluec se tapist et achoise.
Or fu au lit grande la noise
De la dame et de son mari,
Qui moult avoit le cuer mari
De ce qu’il a perdu sa paine :
A paine puet r’avoir s’alaine,
Tant orent hustiné ensamble.
Mès la mesnie les dessamble,
Si est remèse la meslée.
Et Alous a trète s’espée,
Celui quiert avant et arrière ;
N’i remest seille ne chaudière,
Que li bouvier n’aient remut.
Or sevent bien et voient tuit
Que par songe est ou par arvoire ;
Ne tienent pas la chose à voire.
« Sire, font-il, lessiez ester ;
Alons dormir et reposer ;
Songes fu ou abusions.
— Vois por les vaus, vois por les mons,
Fet Alous, qui ne mariroit,
Quant je le ting orains tout droit
A mes .II. mains, et vous que dites ?
Conment ! s’en ira-il donc quites ?
Alez le querre en cel mestier,
Et sus et jus en cel solier,
Et si gardez soz cel degré :
Moult m’aura cil servi à gré
Qui premiers le m’enseignera ;
.II. sestiers de forment aura,
Au Noel, outre son loier. »
Quant ce entendent li bovier
Qui moult covoitent le forment,
Çà et là vont isnelement ;
Tout par tout quièrent sus et jus ;
S’or n’est li prestres bien repus,
Tost i puet perdre du chatel.
Or avoit-il enz en l’ostel
Hersent, une vieille bajasse,
Qui moult estoit et mole et crasse ;
En l’estable s’en vient tout droit
Où li prestres repuz estoit,
Tous sanz lumière et sanz chandeille ;
Les brebis eschace et esveille,
Et va querant et assentant
Où li prestres ert estupant ;
S’avoit ses braies avalées,
Et les coilles granz et enflées,
Qui pendoient contre val jus :
Or est li eus entor velus ;
Si sambloit ne sai quel figure.
Hersens i vint par aventure ;
Ses mains geta sor ses collions ;
Si cuide que ce soit moutons
Qu’ele tenoit iluec endroit
Par la coille qui grosse estoit ;
Et .I. poi met ses mains amont ;
Velu le trueve et bien roont
En .I. vaucel en le moière ;
Hersent se trest .I. poi arrière ;
Si se merveille que puet estre.
Et cil, qui veille, c’est le prestre,
Hersent saisi par les timons,
Si près de li s’est trais et joins
Qu’au cul lui a pendu sa couple.
Or est Hersent merveille souple,
Ne set que fère ; s’ele crie,
Toute i vendra jà la mesnie ;
Si sauroient tout cest afère ;
Dont li vient-il miex assez tère
Qu’ele criast, ne féist ton.
Hersent, ou ele vueille ou non,
Sueffre tout ce que li a fait,
Sanz noise, sanz cri et sanz brait ;
Fère l’estuet, ne puet autre estre.
« Hersent, fet-il, je sui le prestre ;
A vo dame ère ci venuz.
Mais j’ai esté apercéuz ;
Si sui ci en grant aventure ;
Hersent, gardez et prendez cure
Conment je puisse estre delivres,
Et je vos jur sur toz mes livres
Que toz jors mes vous aurai chière. »
Hersent, qui fet moult mate chière :
« Sire, fet-ele, ne cremez,
Quar, se je puis, bien en irez. »
A tant se liève, si s’en part
Hersens[7], qui auques savoit d’art ;
Samblant fet qu’ele soit irée,
A haute voiz[8] s’est escriée :
« Fil à putain, garçon, bouvier,
Que querez-vous ? Alez couchier,
Alez couchier, à pute estraine ;
Come a or emploie sa paine
Ma dame, qui tant bien vous fet !
Moult dit bien voir qui ce retret :
Qui vilain fet honor ne bien,
Celui het-il sor toute rien ;
Tel loier a qui ce encharge.
Ma dame n’a soing de hontage,
Ainz est certes moult bone dame ;
Bon renon a de preude fame.
Et vous li fètes tel anui.
Mès, se j’estoie com de i,
Céenz n’auriez oés ne frommage
S’auriez restoré le domage ;
Des pois mengerez et du pain ;
Bien vous noma à droit vilain
Cil qui premiers noma vo non,
Par droit avez vilain à non,
Quar vilain vient de vilonie.
Que querez-vous, gent esbabie ?
Que menez-vous tel mariment ? »
Quant li bouvier oient Hersent
Et il entendent la manace[9],
S’ont grant paor que li frommage
Ne voist chascun de fors le ventre ;
Tout maintenant vienent ensamble
Por eus desfendre[10] et escondire :
« Hersent, font-il, ce fet no sire,
Qui nous fet fère son talant ;
Mes ce sachiez d’ore en avant,
N’i a celui qui s’entremete ;
No dame done sanz prometre,
Et si est moult et preus et sage,
Et noz sire fet grant outrage
Qui à si grant tort la mescroit ;
Or entend bien avoec, et voit
Que il a tort ; si va couchier. »
Recouchié sont tuit li bouvier.
Et Alous moult sa fame chose,
Et dist que ne face tel chose,
Dont il ait honte en mi la voie.
« Diex, com puis ore avoir grant joie,
Fet la dame, de tel seignor
Qui me porte si grant honor !
Honis soit or tels mariages,
Et honis soit li miens parages
Qui à tel homme m’ont donée ;
Ne jor, ne soir, ne matinée,
Ne puis avoir repos ne bien,
Et si ne set ne ne voit rien
Porqoi il me mescroit issi.
Moult aura lonc afère ci,
S’ainsi me veut adès gueter ;
Dès ore a moult à espier ;
Assez a encarchié grant fais.
— Dame, fet-il, lessiez me en pais,
A mal éur aiez repos. »
A tant li a torné le dos,
Et fet semblant que dormir doie.
Et li prestres, qui ne s’acoie,
Qui en l’estable estoit repuz,
De rechief est au lit venuz :
Si se couche avoeques s’amie,
Et Alous, qui ne dormoit mie,
Sent que li prestres est montez,
Et lui méisme est porpensez
Que il sont dui, et il est seus :
Si n’est mie partiz li geus,
Quar il est seus et il sont dui ;
Tost li porroient fère anui,
S’il començoient la meslée.
Tout coiement a pris s’espée,
D’iluec se liève, si les lait ;
A ses bouviers iriez revait :
« Dors-tu, fet-il, va, Rogelet ?
Foi que doi ti, revenuz est
Cil qui ma fame m’a fortret ;
Estrange honte m’aura fet ;
Eveille tost tes compaignons,
S’alons à lui, si l’assaillons,
Et se par force prendons l’oste,
Chascuns aura ou chape ou cote,
Et son braioel à sa mesure. »
Si s’afiche chascuns et jure,
Quant il entendent la promesse,
Que maus eus lor chantera messe,
Se le puèent tenir aus poins.
Hersent, qui n’estoit mie loins,
Qui n’ert encore recouchie,
S’estoit à un huis apoïe ;
D’iluec entendoit tout le fet,
Et tout l’afère et tout le plet,
Conment Alous porquiert sa honte.
Au prestre[11] vient, et se li conte ;
Mès or se liet, et si se gart.
Et li prestres[12] d’iluec se part,
Mès trop se tarde à destorner ;
Ce li porra sempres peser,
Qu’Aloul en mi sa voie encontre :
« Diex, fet li prestres, bon encontre. »
Et Alous saut et si le prent
Par les cheveus iréement ;
« Or ça, fet-il, fil à putain,
Or i metez chascun sa main,
Esforciez[13]-vous du retenir. »
Qui lors véist bouviers venir,
Se li uns fîert, li autres boute,
Come cil qui n’i voient goute :
Por le prestre ont Aloul aers,
Les os li froissent et les ners ;
Del retenir s’esforcent[14] tuit,
Et li prestres saut, si s’enfuit,
Ne set quel part, quar il est nuis,
Si ne set assener à l’uis,
Moult volentiers vuidast l’ostel,
Tant que il trueve .I. grant tinel,
Et taste à terre et trueve .I. van ;
Fez ert en méisme cel an ;
Li vans ert moult et granz et lez,
Apoiez ert à uns degrez.
Le van a pris et si l’en porte[15]
Sus les degrez, et s’en fet porte,
Iluec vaudra estai livrer :
Bien saura son parrin nommer[16]
Qui là vaudra à lui venir,
Tant come il se porra tenir.
Or ert li prestre en forterèce,
Et Alous est en grant destrèce,
Que li vilain ont entrepiez ;
Vilainement fust jà tretiez,
S’il ne se fust si tost nommez.
Ours ne fu onques miex foulez,
Que li vilains prist au broion,
S’il ne nomast si tost son non.
Quant il sèvent que c’est lor sire,
Si ne sèvent entre eus que dire,
Que moult en est chascuns iriez.
« Sire, font-il, estes bleciez ?
— Naie, fet-il, j’ai pis éu ;
Mès or tost alumez le fu,
Et si fètes au couvenant[17]. »
Le feu alument maintenant,
Par la méson quièrent le prestre ;
Rogiers, qui ert toz li plus mestre,
Son Seignor veut servir à gré.
Contremont puie le degré
Dont li prestres l’entrée garde ;
Mès Rogiers, qui ne s’en prent garde,
Sempres aura une cacoute ;
Le van, qu’il tint, enpaint et boute
Si qu’il le perce et qu’il l’esloche,
Et li prestres vers lui s’aproche ;
Tele li paie sor l’eschine,
De son tinel, que tout l’encline
Jus del degré enmi la place.
Or a Rogiers ce que il chace ;
Se Rogiers a riens qui li poist,
Ce m’est avis, c’est à bon droit :
Qu’aloit-il querre la folie[18] ?
Ez-vous Aloul et sa mesnie ;
« Diva, fet-il, es-tu hurtez ?
— Sire, fet-il, mal sui menez ;
Tout ai froissié et cors et vis.
Que je ne sai quels Antecris
M’a si féru seur cel degré ;
Près va que n’ai le cuer crevé ;
Mestier auroie de couchier. »
Sor les degrez vont li bouvier ;
« Par le cul bieu, qui est-ce dont ? »
Lor buissons lievent contremont ;
Savoir vuelent ce que puet estre,
Et gardent, et voient le prestre
Qu’est apoiez deseur la porte,
Et voient le tinel qu’il porte ;
Si se traient chascuns arière,
Quar paor ont que il nés fière,
Et Alous saut, s’espée trait,
Hardiement vers lui en vait,
Com cil qui moult est aïrez.
Contremont puie les degrez,
Monte .IIII. eschaillons ou .III. ;
Le prestre escoute, s’est toz cois.
Fet-il : « Qui estes-vous là sus ?
— Li prestres sui, estez en sus.
Qui fortune grieve et demaine ;
Est-il ore jors de quinsaine ?
Je cuidoie qu’il fust Noel,
S’ai grant paor que cest tiné[l]
Ne vous viengne parmi le col ;
Bien se porra tenir por fol
Qui sentira combien il poise. »
Dont reconmença la grant noise
Entre le prestre et les bouviers.
Alous, qui auques estoit fiers,
Tant a aie qu’il vint au van ;
Si en abat le meillor pan
A s’espée qui bien trenchoit.
Li prestres, quant il l’aperçoit
Que on abat sa forterece,
Cele part son tinel adrece,
Et fiert Aloul par tel vigor
Qu’il li fet prendre .I. si fet tort
Qu’aine tant come il mist à descendre,
Ne trova point de pain à vendre.
Quant à terre par fu venuz,
S’est si dolenz, s’est si confuz,
Qu’il ne pot dire .I. tout seul mot.
« Aloul, céenz sont li malot,
Fet li prestres, en ce tinel ;
Ne vous vuelent en lor ostel,
Ce m’est avis, acompaignier ;
Mès, se léenz éust bouvier
Qui en éust meillor éur,
Viegne ça sus tout aséur,
Moult bien puet estre de l’ostel ;
Mès, s’il i pert de son chatel,
De rien n’en revendra à moi,
Quar cist chastiaus est en defoi ;
Dont i fet-il mauvès monter. »
Qui donc oïst bouviers jurer
Les mons, les tertres et les vaus,
Ainz i sera chascuns si chaus,
Et si matez, et si delis,
C’on les porra escorchier vis,
Ainz qu’il ne l’aient mis à terre.
Lors reconmence la granz guerre
Entre le prestre et les bouviers ;
Moult i sera li assaus fiers.
Au degré sont tuit assamblé
Li bouvier, qui moult sont troublé ;
Por lor seignor sont coroucié.
Jà ont tant fet et tant drecié
Tout environ et bans et perches,
Seles, eschieles, eschamperches,
Qu’au prestre vienent à delivre.
Et il si bien d’aus se delivre
Qu’il n’i a si hardi, ni tel,
Ne .I., ne autre, enz en l’ostel,
Tant soit garnis ne bien couvers,
Qu’il ne le trebuche à envers
Jus de l’eschiele, maugré sien ;
Quar il entent et voit très bien
Que, s’il le tienent à delivre,
A deshonor le feront vivre,
A grant vergoingne et à grant honte.
A tant ez Robin qui i monte,
.I. des plus fors de tout l’ostel ;
En sa main tient .I. si grant pel
Qu’à grant paine le soustient-il ;
Là où en a .IIIc. ou mil,
N’i a il plus hardi qu’il est ;
Cil passe d’auques Rogelet,
Quar moult est plus entremetanz ;
Moult se tendra por recréanz
Se il ne venge son seignor ;
C’est cil qui porte le tabor
Le Diemenche à la carole.
De rien le prestre n’aparole,
Ainz vient avant ; si l’empaint outre,
Et le prestre de son pel boute
Si qu’il le fet tornerseur destre ;
Puis vint avant, s’aert le prestre
Par les cheveus ; à lui s’acouple,
Et cil, qui crient perdre sa couple,
Se dresce, s’a estraint les denz,
Robin sesi parmi les lenz ;
A ses .II. mains à lui le tire,
Et cil resache par grand ire ;
Si s’entretienent vivement
C’on les péust sus .I. jument
Porter ans .II., se il fust qui.
Et li bouviers lievent le cri :
« Seignor, font-il, montons là sus ;
Prenons bastons, tineus et fus ;
S’alons no compaignon aidier. »
Quant assamblé sont li bouvier,
Si montent tuit communaument,
Et li prestres, quant il entent
Que Robins doit avoir aïue,.
Si se resforce et esvertue ;
Tant a Robin à lui tiré,
Que desouz lui l’a enversé
Toz les degrez outre son vueil,
Si qu’il li samble que li oeil
Li soient tuit du chief sailli.
Mès or sont-il si mal bailli
Qu’il ne se pueent retenir,
Ainz les couvint[19] aval venir ;
Les degrez ont toz mescontez,
Et si les a toz enversez
Cil qui aloient à l’assaut,
Tant ert jà chascuns montez haut,
Que sempres se tendront por fol.
Li degré chiéent seur lor col,
Si les trébuchent et abatent,
Les pis, les testes lor debatent,
Les braz, les flans, toz les costez ;
Bien ont toz les degrez contez.
Quant à terre par sont venu,
Si chéirent ensamble el fu,
Qui moult estoit alumez granz.
Moult souffrirent cil granz ahanz
Qui desouz furent, ce sachiez ;
Qui plaint ses braz, et qui ses piez,
Et qui son cors, et qui sa teste.
Or vous dirai conment le prestre
Est mal baillis et decéuz ;
Quant à terre fu parvenuz,
Si le saisi dans Berengiers.
C’est uns vilains, c’est .I. bouviers ;
Les jumenz seut chacier devant ;
Aine ne véistes son samblant ;
L’un œil a lousque, et l’autre borgne ;
Toz diz regarde de clicorgne ;
L’un pié ot droit, et l’autre tort.
Cil tint le prestre si très fort
Par .I. des piéz qu’il ne li loist
A reperier là où soloit,
Ainz huche et crie hautement :
« Que fètes-vous, mauvese gent ?
Venez avant, et si m’aidiez
Que cis prestres soit escoilliez.
Par les nons Dieu, s’il nous eschape,
Chascuns aura perdu sa chape
Que nous promist, et no cotele. »
Quant li prestres ot la novele,
Sachiez que point ne li agrée ;
Tant a sa jambe à soi tirée
Que des mains dant Berengier l’oste ;
Mès il i a lessié sa bote,
Et son sorcot por son ostage ;
Miex li vient-il lessier son gage
Que de lessier son autre afère.
Bien voit qu’il n’a léenz que fère ;
D’iluec se lieve, si les lesse,
Et chascuns après lui s’eslesse ;
Qui rue fust, et qui tinel.
Li prestres entre en .I. chapel ;
Si se pent là sus contremont ;
Ses genouz met tout en .I. mont ;
Si se quatist que on nel truist.
Cil i vienent, si font grant bruit ;
El chapel sont trestuit entré,
Mès il n’ont nule rien trové,
Ne .I. ne el, néis le prestre ;
Moult se merveillent que puet estre ;
Ce lor samble estre faerie.
Li plus sages ne set que die ;
Si sont dolant et abosmé ;
Tuit cuident estre enfantosmé
Del prestre, qui les a brullez ;
Forment en est chascuns irez.
Del chapel sont tuit fors issu ;
A lor seignor en sont venu ;
Se li ont les noveles dites
Que li prestres en va toz quites.
« Quites, déable, fet Alous,
Et je remaindrai ci si cous ;
N’en serai vengiez par nului !
Des or me torne à grant anui
Li acointance de ce prestre.
Se vos volez mi ami estre,
Si le m’aidiez à espier
Une autre foiz. Alons couchier,
Que je suis moult bleciez ès costes ;
Maudiz soit ore si fèz ostes
Qui cop me fet et si me blece !
N’aurai mès joie, ne leece,
Si me serai de lui vengiez. »
Atant se r’est Alous couchiez.
« Seignor, fet-il, prenez escout
En cele cort et tout par tout,
Car il me samble tout por voir
Qu’il soit ancor en cest manoir ;
Por ce, s’en cest manoir estoit
Nul lieu repuz, trover seroit.
— Sire, à bon eur, font li bouvier ;
Mès il nous covendra mengier,
Que nous avons anuit veillié ;
Si sommes auques traveillié ;
N’i a celui ne soit lassez.
— Ce vueil-je, fet Alous, alez,
Mengiez, et si veilliez trestuit ;
N’i a mes gueres de la nuit ;
De legier le poez veillier. »
Lors se départent li bouvier ;
Si font grand feu por aus chaufer ;
Entr’aus conmencentà parler ;
Du prestre et de s’aventure
Li uns à l’autre si murmure :
Quant assez orent murmuré,
Et dit, et fet et raconté,
Si reparolent du mengier ;
C’est la costume du bouvier ;
Jà n’en ert liez s’il ne menjue.
Rogiers, qui porte la maçue
Desus toz cels de la meson,
Conmande c’on voist au bacon
Et aporce on[20] des charbonées,
Mès qu’eles soient granz et lées,
Si que chascuns en ait assez.
Entruès est Berengiers levez
Par le Rogier conmandement ;
Un coutel prist isnelement,
Qui d’acier est bien esmoluz.
Tant a alé qu’il est venuz
Droit au chapel, où li bacons
Estoit penduz sus les bastons ;
Berengiers va par tout tastant
Le plus cras à son esciant,
Quar il set bien que el plus cras
Est tout adès li mieudres lars.
Endementiers que il le taste,
Le prestre saisi par la nache ;
Par leus le trueve mole et dure ;
Si cuide que ce soit presure,
C’on i saut pendre en tel manière.
Avant retaste, et puis arrière,
Tant qu’il encontre les genous ;
Si cuide avoir trové os cors
C’on i ait mis por le sechier ;
Forment se prist à merveillier
De ce qu’il trueve tel harnas.
Sa main a mis de haut en bas ;
S’a encontre le vit au prestre.
Or ne set-il que ce puet estre,
Por ce que il le trueve doille,
Se c’est chauduns, ou c’est andoille
Con i ait mis por essuer.
Celi voudra, ce dist, coper,
Por ce que c’est uns bons morsiaus.
Li prestres ot que li coutiaus
Li vaitsi près des genetaires ;
Si ne mist au descendre gaires ;
Seur Berengier chiet à .I. fais,
Les os li a brisiez et frais ;
Près va qu’il n’a percié le col.
Or se tient Berengiers por fol,
Quant il i vint sanz le craisset.
Au retorner arrier se met ;
Au feu en va toz esmanchiez :
« Seignor bouvier, fet-il, aidiez,
Que cil bacons soit rependuz ;
La hars est route ; s’est chéuz ;
Par pou ne m’a le col tout frait
Parmi le col ; ait mal dehait
Li machecliers qui le dut pendre. »
Qui donc véist lumière prendre
Et alumer par la meson ;
Berengiers les maine au bacon
Por esgarder et por véir
Conment ce fut qu’il pot chéir.
Quant il parvindrent el chapel,
N’i troverent ne .I. ne el ;
Là sus estoient les bacons,
Si com devant, sor les bastons,
Tout .XX. ; n’en ert nés .I. à tire ;
Lors conmencierent tuit à rire.
Li .I.[21] dient que Berengier
N’osa le bacon aprochier ;
Li autres dist que bien puet estre
Que il avoit paor du prestre ;
Por ce fu-il si effraez.
« Seignor, fet-il, or est assez ;
Bien puet huimès ce remanoir ;
Mès je di bien, et si di voir,
Que je senti que uns bacons
Chéi sor moi o les jambons ;
Encore i avoit-il presure,
Que je senti et mole et dure ;
Or esgardons que ce puet estre. »
— Je cuit, font-il, que c’est le prestre,
Dont Berengiers senti les piez ;
Por nous estoit là sus muciez ;
Gardons partout que il n’i soit. »
Et Berengiers garde, si voit
Le prestre ester devers .I. huis ;
Mès li obscurtéz et la nuis
Li desfent moult à raviser.
Le prestre prent à portaster.
Et li prestres, quant il entent
Que Berengiers le voit et sent,
Si set très bien que trovez iert ;
Entre col et chapel le fiert
Del poing, qu’il ot gros et quarré,
Si qu’à ses piez l’a enversé :
« Alez, fet-il, dant Berengier,
Avez vous tost vostre loier ;
Destornez-vous, et levez sus ;
Cuites estes et absolus ;
Ne sai doner autres pardons ;
Fetes venir voz compaignons,
Si auront part en ceste offrande.
Fols est qui fol conseil demande ;
Ne vous tieng mie trop à sage,
Quant de fère si fet message.
Aviez seur toz pris le baston ;
Adès vuelent cil viez bordon
Lor talent fère et acomplir.
Fetes voz compaignons venir ;
S’auront de ce bienfet lor pars. »
Qui donques véist de toutes pars
Venir bouviers à grant foison,
Sempres aura male leçon
Li prestres, s’il ne se desfent.
Et Rogiers saut premierement ;
Si le saisi par la main destre,
Et li prestres de sa senestre
L’a si féru arrière main
Que tout le fet doloir et vain.
Moult fust en maies mains Rogiers,
Ne fust la torbe des bouviers
Qui moult l’angoisse et moult l’apresse ;
Des bouviers i avoit tel presse
Que tout emplissent le chapel ;
Mès il ont doute du tinel,
Dont il avoit devant servi.
Tel noise mainent et tel cri
Que Alous lor sire s’esveille,
Qui de la noise s’esmerveille ;
Tantost conme il la noise entent,
Aperçoit-il tantost et sent
Que c’est li prestres ses amis,
Qui de rechief s’est léenz mis.
Il saut en piez, si trait l’espée,
Si s’en vint droit à la meslée ;
Quant parvenuz fu à l’assaut,
Parmi trestoz ses bouviers saut ;
S’aert le prestre par derrière,
Et cil le fiert parmi la chière,
Si qu’il l’abat sor .I. bouvier.
Mès que vaudroit à detrier ?
De toutes pars chascuns l’assaut,
Et sa desfense poi li vaut.
Retenu l’ont et pris entr’aus ;
Par tant si est remez l’assaus.
Alous à ses bouviers demande
S’il l’ocirra, ou il le pande.
Il respondent communement
Qu’il n’en puet fère vengement,
De qoi on doie tant parler,
Come des coilles à coper.
« Coper, fet Alous, mès noier.
Et ne pourquant soit au trenchier,
Quar vous dites parole voire ;
Vostre conseil vueil-je bien croire ;
Or alez, le rasoir querez
Dont cil prestres sera chastrez ;
Fetes isnelement et tost. »
Quant li prestres entent et ot
C’on dit de lui itel parole,
Doucement Aloul aparole.
« Aloul, dist-il, por Dieu merci,
Ne me desfigurez issi ;
De pechéor miséricorde.
— Jà voir n’en sera fête acorde,
Fet Alous, à nul jor, ne paie. »
Se li prestres dès lors s’esmaie,
De legier le puet-on savoir.
Il ont aporté le rasoir,
Le prestre enversent et abatent ;
Moult le laidengent et debatent,
Ainz qu’il le puissent enverser ;
.I. taiseron font aporter
Por les jambes miex eslaisier.
« Liquels s’en saura miex aidier
Viegne, si praingne le rasoir.
— Je, sire, fet Berengiers, voir ;
Je li aurai moult tost copées. »
Les braies li ont avalées,
Et Berengiers jus s’agenoille,
Si prent le prestre par la coille.
Jà fust le prestre en mal toeillé,
Quant la dame, le feu toeillé,
Vint acorant à sa baisselle ;
Devant li trueve une grant sele,
Qui moult estoit et fors et granz ;
A ce qu’ele est fors et pesanz,
Fiert Berengier si sor l’eschine
Qu’ele renversa et encline ;
Près va que n’a perdu la vie.
Et Hersens prent une hamie ;
Si le fiert si parmi les rains
Que li craissès[22] li est estains,
Et li bouvier tout se departent
Por les granz cops qu’eles departent ;
Chascune tel estor i livre
Que le prestre tout à delivre
Ont mis et jeté du manoir,
Et il s’enfuit, si fet savoir,
Lassez et traveilliez et vains.
Bien ert chéus en males mains,
Quar si cheveil contremont tendent
Et les pesques contreval pendent
De son sorcot et de sa cote ;
En gage i a lessié sa bote.
Eschapez est de grand peril ;
Moult a esté en grant escil.
- ↑ XXIV. — Le Flabel d’Aloul, p. 255.
Publié par Barbazan, II, 252 ; par Méon, III, 326-357 ; et donné en extrait par Legrand d’Aussy, IV, 201-203.
- ↑ Vers 1 — veult, lisez veut.
- ↑ 77 — conois, lisez connois.
- ↑ 129 — sorvengne, lisez sorviengne.
- ↑ 205 — defferm, lisez desferm.
- ↑ 214 — descent, lisez destent.
- ↑ 384 — Hersent, lisez Hersens.
- ↑ 386 — voix, lisez voiz.
- ↑ 411 — menace, lisez manace.
- ↑ 415 — deffendre, lisez desfendre.
- ↑ 482 — prestres, lisez prestre.
- ↑ 484 — prestre, lisez prestres.
- ↑ 493 — Efforciez, lisez Esforciez.
- ↑ 499 — efforcent, lisez esforcent.
- ↑ 509 — emporte, lisez en porte.
- ↑ 512 — parin nomer, lisez parrin nommer.
- ↑ 529 — convenant, lisez couvenant.
- ↑ 547 — là, folie ; lisez la folie.
- ↑ 676 — convint, lisez couvint.
- ↑ 787 — apoice-on, lisez aporce on.
- ↑ 847 — uns, lisez (.I.) un.
- ↑ P. 287, l. 21, craissés, lisez craissès.