Thresor de la langue françoise/Angleterre
Angleterre, f. pen. Est la plus grande partie d’vne isle Septentrionale en l’Ocean, en titre de Royaume, dont l’autre & moindre partie en pareil titre, est Escosse, anglia, comme si l’on disoit, Anglorum terra, Elle a eu nom Britannia maior, à Brittone rege, comme dit Polyd. Virgil. Bretagne la grande, en difference de Britannia minor ditte Armorique. Matthieu de Westmonstier sous l’an CCCCXLIX. recite qu’à la semonce de Vortigerne Roy d’icelle grande Bretagne, aucuns Saxons, Anglois & Iutes de la nation Germanique y veindrent herberger pour estre ses soldoyers alencotre de ses ennemis. Et sous l’an DLXXXVII. Athelbert, Cissain, Ceaulin, Grodde, Erkenwin, Tytille, Ella, Aethefride, roitelets tenans entr’eux ladite isle mipartie, d’vn commun aduis abolirent l’ancien nom de Bretagne, & ordonnerent que du nom desdits Anglois elle seroit de là en auant nommée anglia. Mais Polyd. Virg. aux 6. & 7. liur. de l’histoire Angloise attribue cela à Egbert XVII. Roy des Saxons Occidentaux residans en ladite isle.
Anglois, anglus, Britannus, la separation d’Angleterre & Escosse voyez Escosse royaume.