Thresor de la langue françoise/Archer
Archer, m. acut. Est vn mot deriué de ce mot arc, & signifie vn qui tire & vse de l’arc, soit en la guerre ou ailleurs, selon ce on dit, L’homme d’armes auoir tant d’archers. Et parce que les Rois & Princes souuerains, & les preuosts de leurs hostels, pour la garde de leurs personnes, ou autrement, se seruoient de gens portans arcs, on dit encores auiourd’huy, Archers de la garde, & Archers du Preuost de l’hostel, & Archers de telle ville, iaçoit qu’ils ne portent plus d’arcs, ains des hallebardes au lieu d’iccux. Et partant au lieu qu’anciennement ils eussent peu raisonnablement estre dits en Latin Sagittarij ou Arcubalistarij, on les pourroit à present appeler hastati, car quant à ce mot Spiculatores, il conuient aux seuls cent gentils-hommes de la maison du Roy portans l’Espieu, & de les dire laterones, ne Satellites, ne custodes, comme aucuns veulent, le premier d’iceux mots n’exprime l’energie du François Archer, le second ne le represente aucunement, & le tiers ne satisfait qu’à ceste adiection de la garde, quand on dit Archer de la garde, voyez Arc.