Thresor de la langue françoise/Aulne
Aulne, f. pen. est vne espece d'arbre fluuiatile, ou pour plus generalement dire Aquatique (car elle s'aime en fonds moiteux) laquelle est de bois tendre & leger, ne portant ne fruict ne semence, l'escorce duquel sert aux tanneurs de cuyrs. Alnus, duquel mot Latin le dessusdit François est fait. voyez Aulnaye. aulne aussi est vne espece de mesure, à mesurer draps de laine, toiles, tapisseries, passemes, & autres telles marchadises, laquelle contient de long trois pieds sept poulces, & huit lignes, lesquelles lignes sont figurées ainsi Et se diuise premierement en deux parties égales, appelées demies aulnes, puis en trois égales parties, qu'on dit tiers d'aulne. Puis en quatre aussi égales appelées quarts d'aulne. Puis en huit égales parties, qu'on appelle demis quartiers. Et finalemet en seize partes égales, appelées seiziesmes, qui est la derniere & moindre partition de l'aulne, qu'on face, & dont on vse. En chacune desquelles parties de desbris de l'aulne, pour les nommer on adiouste tousiours ledit mot aulne, comme vn tiers d'aulne, vn quart d'aulne, vn demy quart d'aulne, vn seiziesme d'aulne. Et est notamment dit cy dessus draps de laine, parce que l'aulne cy dessus est l'aulne commune, dont chacun vse, fors les marchans de draps de soye, qui ont l'aulne plus petite, d'enuiron demy poulce. On appelle aussi aulne, le baston estelonné à l'estelon de la mesure dessusditte, auquel auec petits clouds de laton à teste de daulphin, fleur de lys, ou estoile, toutes lesdittes partitions de l'aulne sont marquées. Vlna, dont vient le François, Aulne, par prothese de la voyele A. Selon ce on dit, Cette tapisserie contient cent aulnes.