Thresor de la langue françoise/Carroce
Carroce, m. penac. ou bien Carroche, est vn mot Italien puis nagueres naturalizé en France, & signifie vne espece de coche à ciel suspendu en imperiale, à rideaux, accoudoirs & marchepieds, seruant pour la ville & pour les champs, Carruca. Duquel mot Latin, l'Italien Carroccio ou Carrozza semble estre venu. Carroche aussi (comme escrit Ricordano Malespini) estoit le char sur quatre rouës peint en rouge, sur lequel estoient esleuez deux grands masts de mesme couleur sommez d'vn grand estendart ventilant, aux armes de la Republ. de Florence, mi-parti de blanc & de rouge, lequel char estoit tiré à vne paire de grands bœufs houssez de drap rouge, ne seruants qu'à cela. Le conducteur desquels estoit franc de deuoirs & subsides. Et en vsoient les Florentins de iadis par triomphe, bobance & grandeur, & le menoient au deuant des Princes venans à Florence. Et quand ils alloient faire la guerre, les Contes & Cheualiers voisins le tiroient hors de l'œuure de Saint Iean, le conduisans en la place du marché-neuf de Florence, où ils le mettoient entre les mains du peuple, lequel le conduisoit à l'armée, à quoy faire & pour le garder estoient deputez les plus vertueux, de plus d'effort & valeur de tout le peuple, & à iceluy carroche, comme à la principale enseigne, auoit l'ocil & se rengeoit toute l'armée.
Carrochier, m. acut. Celuy qui meine la carroche, Carrucarius, ou bien Carrocier, comme le François le prononce.