Thresor de la langue françoise/Chamailler
Chamailler, c’est frapper à coups d’espée, de hache, ou autre chose de fer sur vn harnois ou autre fer rude. Il semble que le mot soit ainsi dit, parce que anciennement les hommes d’armes estoient armez de hauberts qui estoient faits de mailles de fer, sur lesquels estoient ruez & donnez les coups en eux combattant, taschans à les desmailler & ouurir. au 2. liu. d’Amad. mais Oriante voyant le piteux estat auquel estoit Amadis, & la faute que luy faisoit son harnois desmaillé cuida s’esuanouir. Et peu apres, Messieurs, Amadis est bien en grande necessité par faute de son harnois, voyez son escu dehaché, & son haubert tant desrompu, qu’il n’a quasi dequoy plus se couurir. Aucuns dient que ce mot vient de Malleus & Malleare Latins, ce qui n’est pas du tout hors de propos.
Chamaillis, est de mesme facon de mot que Cliquetis, & signifie le bruit & son que font les armes quand on combat asprement. Il se prent pour le combat mesmes, au 2. liur. d’Amad. Et commenca entre eux deux vn chamaillis si cruel qu’il n’y eut homme present qui ne s’en esbahist.