Thresor de la langue françoise/Dais
Dais, m. Qu’on escrit aussi dez & deés monosyllabe comme Seel. C’est vn poile quarré à pendants en cortine par deuant & aux costez, & à grand dossier deuallat bien bas par derriere, frangé par tout, qu’on met ou sur la table des Rois & Princes souuerains où ils prennent leurs repas, ou sur leurs thrones royaux, & ce par grandeur plus que pour obuier à la cheute de la poussiere. Aussi n’est-il licite en vser à autres qu’aux Princes souuerains. Combien que selon l’vsage d’auiourd’huy Dais soit autre chose que Poile, neantmoins il semble que nos maieurs ayent appelé Poile ce que nous appelons Dais, comme se void en Maugist d’Aigremont, où est escrit : Adoc la pucelle Y sanne, qui estoit sœur de ladite Dame, print vn poile qui là estoit, & le coupa par le milieu, & dedans enuelopa les deux petits enfans. Car il est indubitable que l’Auteur n’entend parler d’vn Poile qu’on porte à quatre bastos sur la personne d’vn Roy ou Prince souuerain à leurs premieres entreés és villes de leur obeissance, ains d’vn Dais souspendu, qui est ordinaire és maisons des Roys, voyez Poile.